Россиялик машҳур видеоблогер Гусейн Гасанов жиноий иш бўйича федерал қидирувга берилди ва сиртдан ҳибсга олинди. Бу ҳақда “ТАСС” хабар берди.
Тергов қўмитаси маълум қилинишича, блогер 2019—2021 йилларда 170 миллион рублдан ортиқ солиқ тўламаган. Ушбу маблағнинг 20 миллионини ноқонуний равишда легаллаштирган. Блогер хорижга қочиб кетгани таъкидланган.
Прокуратура маълумотларига кўра, Гусейн Гасанов ўйин ҳомийлари, курслар ва спорт ставкалари харидорларидан тушган даромадларни якка тартибдаги тадбиркор сифатида эмас, балки қариндошларининг шахсий ҳисоб рақамлари ва жисмоний шахс сифатида ўз ҳисоб рақамлари орқали ўтказган. Кейин пуллар ечиб олиниб, Гасановга нақд пул шаклида берилган ёки шахсий ҳисоб рақамларига ўтказилган.
Натижада блогерга Россия Жиноят кодексининг 174,1-моддаси 4-қисми “б” банди (шахс томонидан жиноят содир этиш натижасида қўлга киритилган катта миқдордаги пул маблағлари ёки бошқа мол-мулкни қонунийлаштириш (ювиш)) бўйича сиртдан айблов эълон қилинган. Бу етти йилгача колонияда жазо ўташни ёки 1 миллион рубль жаримани назарда тутади.
Гусейн Гасановнинг муносабати
Янгиликларни кўрдим. Ҳа, сиртдан қамоққа олиш баландпарвоз гапдек эшитилади, лекин аслида ҳаммаси бунчалик драматик эмас. Солиқ бўйича барча масалалар ўтган йилдаёқ ёпилган эди. Ҳозирда ҳуқуқшуносларим вазият устида ишламоқда. Буни кўриб чиқамиз ва нуқта қўямиз.
ОАВда солиқдан қочганим ҳақида ёзишмоқда. Лекин мен барча солиқлар ва 320 миллион рубль миқдоридаги жарималарни тўладим... Кимки бировга чоҳ қазиса, ўзи унга тушади, деди Гасанов.
Гасанов — машҳур видеоблогер ва “Миллионер тафаккури” курси муаллифи. Унинг Instagram аккаунтида 30,4 миллиондан ортиқ, YouTube каналида эса 1,37 миллион киши обуначиси бор.
Изоҳ (0)