Нариман Жалил Украинанинг Туркия Республикасидаги фавқулодда ва мухтор элчиси этиб тайинланди. Бу ҳақда мамлакат президенти Владимир Зеленский томонидан имзоланган фармонда сўз боради.
“Нариман Энверович Жалилов Украина Республикасининг Туркия Республикасидаги фавқулодда ва мухтор элчиси лавозимига тайинлансин”, дейилади фармонда.
У ким?
Нариман Жалил қрим-татар сиёсатчиси, журналист ва инсон ҳуқуқлари фаоли ҳисобланади. У 1980 йилнинг 27 апрель куни Ўзбекистонда, аниқроғи, Навоий шаҳрида туғилган. 1989 йилда оиласи билан бирга ватани Қримга қайтган.
Шундан сўнг у Одесса Миллий университетининг Сиёсатшунослик факультетини тамомлаган. Карьерасини “Авдет” газетасида журналист сифатида бошлаб, кейинчалик АТР телеканалида ҳам фаолият кўрсатган. Бундан ташқари, Симферополдаги халқаро мактабда тарих ва ҳуқуқ фанларидан дарс берган.
Нариман Жалил сиёсатга илк қадамни 2013 йили ташлади. Ўшанда у қрим-татар халқининг вакиллик органи — Межлис раисининг биринчи ўринбосари лавозимини эгаллаган.
2014 йили Қрим Россия томонидан босиб олингач, Жалил яриморолдан кетмасликка қарор қилди. Қрим татарлари ва маҳаллий украиналикларнинг ҳуқуқларини ҳимоя қилиш билан фаол шуғулланди. Бу жараёнда у инсон ҳуқуқлари бузилиши ҳолатларини ҳужжатлаштириб, ортида сиёсий мотив турган суд жараёнларида қатнашди.
Бироқ 2021 йил Қрим платформаси саммитида иштирок этганидан сўнг, Россия хавфсизлик кучлари томонидан “диверсия”да айбланиб ҳибсга олинди. Орадан бир йил ўтиб маҳкама уни 17 йиллик қатъий тартибли колонияга ҳукм қилди.
Қрим-татар фарзанди 2024 йил июнь ойида бўлиб ўтган маҳбуслар алмашинувидан сўнг Украинага қайтарилди. Унинг элчи сифатида Анқарага юборилиши Туркиянинг Киев учун нақадар муҳим ўйинчи эканини кўрсатади.
Изоҳ (0)