Украина президенти Владимир Зеленский мамлакат Туркия ва БМТ билан украин дони экспорти масаласида музокаралар олиб бораётганини маълум қилди, деб ёзади «Интерфакс».
«Ҳақиқатан ҳам, биз ҳозир Туркия томони билан ва БМТ билан музокаралар олиб боряпмиз. Портларимиздан дон чиқиб кетиши хавфсизлиги учун масъул бўлган вакилларимиз… Бевосита бош котиб Антониу Гуттериш билан ишлаяпмиз», — деди Зеленский Швеция бош вазири Магдалена Андерсон билан Киевда ташкил қилинган брифингда.
Унинг сўзларига кўра, «энг муҳим нарса — биз ишонмайдиган Россиядан ташқари кимдир бу ерга қандайдир озиқ-овқат маҳсулотини ортиб кетиш учун келадиган у ёки бу давлатлар кемалари хавфсизлигини кафолатлаши керак». «Айнан шу ҳақда ҳозир Туркияда музокаралар олиб борилмоқда», — деди Зеленский.
Шу билан бирга, БМТ, Зеленский таъкидлашича, бу масалада етакчи позицияга эга. «Улар, бизнингча, бу жараёнга бошчилик қилишга тайёр», — деди президент.
«Ўз навбатида биз ҳам вақтни йўқотмаяпмиз ва донимиз экспорти бўйича турли йўллар, ҳам темир йўл, ҳам дарё йўли устида ишлаяпмиз. Биз кундан кунга экспортни оширяпмиз. Бу осон эмас, шароитлар қийин», — дея қўшиб қўйди Зеленский.
Россиянинг позицияси
Бу орада Россия президенти Владимир Путин 30 июнь куни Россия украин донининг олиб чиқиб кетилишига тўсқинлик қилмаётгани, Киевнинг ўзи портларни миналардан тозалаши кераклигини айтганди. «Украина ҳарбий ҳукумати ўз портларига олиб борадиган йўлларга миналар жойлаштирган, уларга миналарни тозалашга ва у ердан дон ортилган кемаларни чиқариб кетишга ҳеч ким халал бермаяпти», — дея аниқлик киритди Путин.
У, шунингдек, украин донини олиб чиқиб кетишнинг бошқа йўлларига ҳам эътибор қаратди. «Руминия, Дунай орқали, ундан кейин Қора денгиз, Польша, Беларусь билан, Азов денгизи портлари орқали», — деди Путин.
Россия Мудофаани бошқариш миллий маркази бошлиғи Михаил Мизинцев 1 июль куни Киев ҳукумати 16 та мамлакатдан келган 70 та чет эл кемасининг очиқ денгизга чиқиш йўлини тўсиб қўйганини маълум қилди. «Расмий Киев томонидан яратилган ўққа тутиш хавфи ва юқори мина хавфи кемаларга тўсиқсиз очиқ денгизга чиқишга имкон бермаяпти», — деди Мизинцев.
Унинг сўзларига кўра, Россия Қуролли кучлари томонидан иккита денгиз гуманитар йўлаклари ишлаб туриши учун зарур шароитлар яратилган, улар кемалар ҳаракати учун хавфсиздир.
Изоҳ (0)