«Дунё уларнинг танобини тортиб қўймади, биз эса тортяпмиз». Зеленский Россия Украина билан музокаралар ҳақида «ҳеч қачон ўйламаганини» айтди

Украина президенти Владимир Зеленский Россия билан музокаралар ҳақида «гап ҳам бўлиши мумкин эмас», чунки Россия ҳукумати мулоқот эмас, уруш олиб боришга тайёр. Бу ҳақда у «Қрим платформаси» форуми якунлари бўйича матбуот анжуманида Ал Арабия нашри журналистининг саволига жавоб бераётиб айтиб ўтди, деб ёзади Meduza.

Зеленский Россия томонидан айтилаётган Украина сулҳ тузишни хоҳламаётгани ҳақидаги даъволарни «кулгили» деб атади. Унинг таъкидлашича, уруш «фақат Украина ҳудудида» бормоқда, у ерда «фақат Украина фуқаролари» ўлдирилмоқда.

«Россия ҳар кунлик ҳужумлари, ёриб ўтишлари ва чекинишлари билан, буларнинг барчасини қонли қотилликлар ва зўравонликлар билан олиб борган ҳолда, барчамизга — сизга ва бизга — мана шундан бошқа ҳеч қанақа музокараларни кўрмаётганини айтмоқда. Биз эса тушунтиряпмизки, улар қилган нарсаларнинг ҳаммаси улар ҳеч қанақа мулоқот ҳақида умуман ўйламаётгани ва олдин ҳам ўйламаганидан дарак беради. Улар бизнинг мамлакатимизни босиб олишга қарор қилди. Лекин улар 2014 йилда бу қарорни қабул қилганида дунё унга яхшигина шапалоқ тортмагани учун, улар давом этаверди, давом этаверди. Биз эса уларнинг танобини тортяпмиз», — деди Зеленский.

Сўнгги марта Россия ва Украина март охирида Истанбулда юзма-юз учрашув ўтказганди. Ўшанда икки мамлакат делегациялари муайян прогрессга эришганини маълум қилганди. Сўнг музокаралар видеоалоқа орқали давом этди, майда эса улар тўхтатиб қўйилди. Томонлар музокаралар жараёнини узиб қўйишда бир-бирини айблади.

22 август куни Владимир Зеленский агар босиб олинган Мариуполда «Азов»нинг асир тушган жангчилари устидан суд уюштирилса, Украина Россия билан музокаралардан бутунлай воз кечишини айтганди.

Айни пайтда Туркия президенти Ражаб Тоййиб Эрдўғон Россия ва Украина президентлари ўртасида музокараларни ташкиллаштирмоқчи.

Август бошида Эрдўғон ва Путин Сочида музокаралар ўтказган эди. CNN Turk маълумотларига кўра, ушбу учрашув давомида Россия президенти Зеленский билан музокаралар эҳтимоли борлигига «ишора қилган».

18 август куни Львовда Украина ва Туркия президентлари ҳамда БМТ бош котиби иштирокида уч томонлама саммит бўлиб ўтди. Унинг якунида Зеленский агар Россия қўшинлари Украинани тарк этсагина РФ билан музокаралар амалга ошиши мумкинлигини таъкидлади. Ўз навбатида Эрдўғон уч томонлама учрашув натижаларини Путин билан муҳокама қилишини билдирди.