АҚШ Конгресси Сенати USAID ва NPR ҳамда PBS жамоат телерадиокомпанияларини молиялаштириш учун ажратилган жами 9 миллиард долларлик давлат харажатларини бекор қилиш тўғрисидаги қонун лойиҳасини маъқуллади. Бу ҳақда CNN телеканали хабар бермоқда.
Та`кидланишича, харажатлар 2025 йилги Америка бюджетига киритилгани боис, уларни бекор қилиш учун Оқ уй Вакиллар палатаси ва Сенатнинг розилигини олиши зарур эди.
Қонунга кўра, энди АҚШ Халқаро тараққиёт агентлиги (USAID) фаолияти учун Давлат департаментига ажратилган 7,9 миллиард доллар ҳамда Америка жамоат телерадиокомпаниясига йўналтирилган 1,1 миллиард доллар федерал бюджетга қайтарилади. Бу сумма NPR ва PBS давлат томонидан молиялаштирилувчи корпорациянинг икки йиллик бюджетига деярли тўлиқ мос келади.
4 июнь куни АҚШ президенти Дональд Трамп Конгрессга хорижий ёрдам ва NPR ҳамда PBSъни молиялаштириш учун ажратилган давлат харажатларини бекор қилиш тўғрисидаги сўровномани юборди. NPR АҚШнинг 797 та радиостанциясини, PBS эса 50 штатдаги 354 та тижорат бўлмаган телестанцияни ўз ичига олади.
“Бу молиявий эҳтиёткорлик сари қўйилган кичик, аммо муҳим қадам ва барчамиз унинг аллақачон зарурият касб этганини тан олишимиз лозим”, дейди Сенатор Жон Тун.
АҚШ Халқаро тараққиёт агентлигининг фаолияти (USAID) 1 июль куни расман тугатилди. Президент Дональд Трамп ўзининг иккинчи президентлик даврида агентликни исрофгарчиликка йўл қўйганликда айблаб, уни аста-секин тугатаётган эди.
USAID ҳақида
Ташкилот 1961 йилда АҚШ президенти Жон Кеннедининг хорижий мамлакатларга ёрдам кўрсатиш тўғрисидаги қонуни қабул қилинганидан сўнг ижро фармони билан ташкил этилган. Агентлик АҚШнинг халқаро ривожланиш масалалари билан шуғулланган бир нечта аввалги идораларининг вазифаларини ўзида мужассамлаштирди. USAID 1998 йилдан бери мустақил агентлик мақомига эга.
USAIDънинг умумий сиёсий раҳбарлигини АҚШ давлат котиби амалга оширади, шунингдек, агентлик президент ва Миллий хавфсизлик кенгашига бўйсунади. Директор ва унинг икки ўринбосарини АҚШ президенти конгресс розилигини олиб тайинлайди.
Ташкилотнинг бюджети 50 миллиард доллардан ошган. Бугунги кунда унинг таркибида 10 мингдан ортиқ ходим ишлайди, уларнинг учдан икки қисми Қўшма Штатлардан ташқарида фаолият юритади. Ташкилот таркибига бир нечта минтақавий ва ихтисослашган бюролар киради.
Изоҳ (0)