Москванинг “ЦСКА” клуби Россия Кубоги финалининг жавоб баҳсида Санкт Петербургнинг “Зенит” жамоасини мағлуб этиб, суперфинал йўлланмасига эга чиқди. Асосий вақт 2:0 натижаси билан якунланди, лекин умумий ҳисоб 2:2 бўлгани сабаб ўйин пенальтилар сериясида давом эттирилди ва унда “армиячилар” 4:3 ҳисобида устун келди.
Ўйиндаги ҳисоб 37-дақиқада Матвей Кисляк томонидан очилган бўлса, 90+2-дақиқада Темурлан Мусаев москваликларнинг иккинчи голини киритди.
Пенальтилар сериясида “ЦСКА”нинг барча футболчиси аниқ ҳаракат қилган бўлса, “Зенит” сафидан Мантуан Густаво ҳамда Александр Соболёв нуқтада адашди. Шу тариқа “армиячилар” икки ўйиндан иборат финал баҳсида ғалаба қозониб, суперфинал йўлланмасига эга чиқди.
Ўзбекистонлик футболчи Аббосбек Файзуллаев 62-дақиқада захирадан туширилди. У Миралем Пьянич билан алмаштирилди.
“ЦСКА”нинг ҳал қилувчи ўйиндаги рақиби бугун, 15 май куни аниқ бўлади. Унда “Спартак” ва “Ростов” жамоалари баҳс олиб боради. Суперфинал учрашуви эса 1 июнга белгиланган.
Россия Кубоги
Финал, жавоб баҳси
14 май, чоршанба
“ЦСКА” — “Зенит” 2:0 (умумий ҳисоб 2:2, пенальтилар серияси 4:3)
Голлар: 1:0 — Кисляк (37), 2:0 — Мусаев (90+2)
Изоҳ (0)