Россия Қирғизистонда кичик қувватли атом станцияси (АЭС) қуришга тайёрлигини билдирди. Бу ҳақда “Росатом” раҳбари Алексей Лихачев “Известия”га берган интервьюсида маълум қилди.
Лихачевнинг сўзларига кўра, Қирғизистон аввало лойиҳанинг аниқ параметрларини белгилаб олиши зарур.
Бир неча йил олдин кун тартибига киритилган масала — Қирғизистонда кичик атом электр станцияси қуриш. Биз ҳамкорларимизга анъанавий маҳсулотимизни таклиф этдик. Бу маҳсулот бўйича Ўзбекистон билан шартномалар имзоланган, Мьянма билан музокаралар олиб борилмоқда ва биз Якутияда ҳам шундай станция қуряпмиз.
Ҳозирда ҳамкорларимиз босқичларни ва керакли қувват даражасини аниқламоқда. Улар ушбу лойиҳанинг аниқ конфигурацияси бўйича сўров шакллантиргач, умид қиламанки, биз уни амалга оширишга киришамиз, деди “Росатом” раҳбари.
У 110 МВт дан 440 МВт гача қувватга эга бўлган блокли атом электр станциясини қуришга тайёр эканликларини қайд этди.
Ўзбекистон ва Россия ўртасида 2024 йил 27 майда имзоланган шартнома бўйича Жиззах туманида ҳар бири 55 МВт қувватга эга 6 та реактордан иборат кам қувватли АЭС қурилади. “Ўзатом” агентлиги директори Азим Аҳмадхўжаев лойиҳа харажатлари 2 миллиард доллардан ошмаслигини айтганди.
Станциянинг нархи икки миллиард доллардан кам бўлади. Бу биз кўзлаган мақсад. Мен аниқ рақам ҳақида гапиришни истамайман, чунки биз доимий равишда уни оптималлаштириш устида ишлаяпмиз, ҳар бир детал нархлари бўйича музокаралар давом этяпти... Биз Россия маблағларини кўриб чиқмаймиз. Чунки барча геосиёсий жараёнларни ҳисобга оламиз, деган эди у март ойидаги интервьюсида.
Изоҳ (0)