Туркия президенти Ражаб Тоййиб Эрдўғон украиналик ҳамкасби Владимир Зеленский билан суҳбатлашди ва унга Россия—Украина музокараларида воситачиликни давом эттиришга ваъда берди, деб ёзмоқда Anadolu.
Эрдўғон бундан олдин ҳам Москва ва Киев ўртасидаги музокара жараёнини давом эттириш учун барча саъй-ҳаракатларини амалга оширганини ва келажакда ҳам бу масалани қўллаб-қувватлашини таъкидлади.
Бундан ташқари, Туркия раҳбари Украинадан денгиз орқали қишлоқ хўжалиги маҳсулотларини ташиш учун хавфсиз йўлак ташкил этиш муҳимлигини қайд этди. Эрдўғон Туркиянинг Россия, Украина ва БМТ иштирокида тузилиши мумкин бўлган бошқарув маркази ишида иштирок этишидан ҳам манфаатдор эканини билдирди. Давлат раҳбари бундай марказни Истанбулда жойлаштирилишига ижобий муносабатда эканини айтди.
Зеленскийнинг Twitter’да ёзишича, суҳбат чоғида «озиқ-овқат хавфсизлигига таҳдид» ва «Украина портларини блокдан чиқариш йўллари» масалалари кўтарилган, «хавфсизлик соҳасида ҳамкорлик» мавзуси ҳам муҳокама қилинган.
30 май куни эрталаб Эрдўғон Россия президенти Владимир Путин билан музокара ўтказган эди. Туркия раҳбари Путинга Россия, Украина ва БМТ вакилларининг Истанбулда учрашувини ташкил этишни таклиф қилган, шунингдек, ҳарбий ҳаракатларнинг салбий оқибатларини минималлаштириш ва томонлар ўртасида ишончни мустаҳкамлаш чораларини кўришга чақирган.
Путин ўз навбатида хавфсиз навигацияни таъминлаш ҳамда Қора ва Азов денгизларида миналар хавфини бартараф этишга эътибор қаратди ва Москва Анқара билан келишилган ҳолда Украина портларидан юклар, жумладан, дон транзитини осонлаштиришга тайёрлигини маълум қилди.
Бундан ташқари, Россия президенти санкциялар бекор қилинсагина Россия жаҳон бозорига «катта ҳажмдаги ўғитлар ва қишлоқ хўжалиги маҳсулотларини» экспорт қилиши мумкинлигини тасдиқлади.
Изоҳ (0)