Қора денгизда дон йўлагини очиш масаласи бўйича музокаралар давом этмоқда, 7—10 кун ичида натижага эришиш мумкин, дея маълум қилди ушбу жараёнда воситачи сифатида иштирок этаётган Туркия президенти Ражаб Тоййиб Эрдўғон Италия бош вазири Марио Драги билан музокаралардан кейин.
«Қора денгиздаги йўлак жуда муҳим. Путин ва Зеленскийнинг ёндашувлари ҳам муҳим… Биз воситачи бўлишда давом этамиз, музокараларимизни фаоллаштириб, уларни бир ҳафта — ўн кунда якунлашга ҳаракат қиламиз», — деди Туркия президенти.
Портларда қолиб кетган қишлоқ хўжалик маҳсулотлари ҳажмларини томонлар турлича баҳоламоқда: Путин июнь охирида 5 миллион тонна дон ҳақида гапирган бўлса, БМТ май бошида 4,5 миллион тонна, Зеленский эса июнь бошида 20—25 миллион тонна маҳсулотлар ҳақида айтганди, улар дон, маккажўхори, арпа, кунгабоқар мойини ўз ичига олади.
Анқара июнь ўрталарида Украинадан дон етказиш муаммоларини ечишда воситачи ролини ўзига олди. Ой охирида Туркия президенти маъмурияти мулоқотлар натижасида Истанбулда дон масаласи бўйича операцион марказ ташкил қилиш бўйича консенсусга эришилганини маълум қилди.
Бу орада Россия президенти Владимир Путин 30 июнь куни Россия украин донининг олиб чиқиб кетилишига тўсқинлик қилмаётгани, Киевнинг ўзи портларни миналардан тозалаши кераклигини айтганди. «Украина ҳарбий ҳукумати ўз портларига олиб борадиган йўлларга миналар жойлаштирган, уларга миналарни тозалашга ва у ердан дон ортилган кемаларни чиқариб кетишга ҳеч ким халал бермаяпти», — дея аниқлик киритди Путин.
У, шунингдек, украин донини олиб чиқиб кетишнинг бошқа йўлларига ҳам эътибор қаратди. «Руминия, Дунай орқали, ундан кейин Қора денгиз, Польша, Беларусь билан, Азов денгизи портлари орқали», — деди Путин.
Россия Мудофаани бошқариш миллий маркази бошлиғи Михаил Мизинцев 1 июль куни Киев ҳукумати 16 та мамлакатдан келган 70 та чет эл кемасининг очиқ денгизга чиқиш йўлини тўсиб қўйганини маълум қилди. «Расмий Киев томонидан яратилган ўққа тутиш хавфи ва юқори мина хавфи кемаларга тўсиқсиз очиқ денгизга чиқишга имкон бермаяпти», — деди Мизинсев.
Унинг сўзларига кўра, Россия Қуролли кучлари томонидан иккита денгиз гуманитар йўлаклари ишлаб туриши учун зарур шароитлар яратилган, улар кемалар ҳаракати учун хавфсиздир.
Аввалроқ Украина президенти Владимир Зеленский мамлакат Туркия ва БМТ билан украин дони экспорти масаласида музокаралар олиб бораётганини маълум қилган эди.
Изоҳ (0)