Россиянинг Курск вилоятидаги меҳмонхона вайроналари остидан 39 ёшли Ўзбекистон фуқаросининг жасади олиб чиқилди. Бу ҳақда 13 май куни Курск губернатори вазифасини бажарувчи Александр Хинштейн хабар берди.
Хабарга кўра, Рилск шаҳридаги меҳмонхона Украина Қуролли кучлари ҳужумида вайрон бўлган.
Меҳмонхона вайроналари остидан Ўзбекистон фуқароси бўлган 39 ёшли эркакнинг жасади топилди. Яқинларига самимий ҳамдардлик билдираман, деган Хинштейн.
У ҳужум вақтида жароҳатланган икки эркакнинг аҳволи ҳамон оғир эканини айтган. Жароҳатланганлар Курск вилоят касалхонасида даволанмоқда.
Россия томонига кўра, 11 май куни кечқурун Украина Қуролли кучлари Курск вилоятининг Рилск шаҳрига ракета ҳужуми уюштирди. Ўшанда уч киши жароҳатлангани ҳақида хабар қилинганди. Ҳужум оқибатида меҳмонхона, иккита хусусий уй, гараж ва бешта автомобиль жиддий зарар кўрган.
2024 йил 6 августда Украина армияси Курск вилоятида ҳарбий операцияни бошлади. 12 августга келиб 28 та аҳоли пункти Украина кучлари назоратига ўтгани ҳақида ўша пайтда вилоят губернатори вазифасини бажарувчи Алексей Смирнов хабар берди. Январь ойида Россия Мудофаа вазирлиги Украина томони минтақанинг 1268 кв/км ҳудудини эгаллаб олганини маълум қилди (Курск вилоятининг умумий майдони — 29,9 минг кв/км). Январь ойи ўрталарига келиб, Россия идораси маълумотларига кўра, 801 кв/км (63,2 фоиз) қайтариб олишга эришилган. Февраль ойида эса Курск вилоятининг 64 фоизи назоратга қайтарилган.
Зеленскийнинг сўзларига кўра, Курскдаги операциянинг асосий вазифаси Россиянинг ҳарбий салоҳиятини имкон қадар йўқ қилиш, қарши ҳужумларни кучайтириш ҳамда Россия ҳудудида буфер зона яратишдан иборатдир. Апрель ойида Россия президенти Владимир Путин Курск вилояти тўлиқ озод этилганини эълон қилди. Украина Қуролли кучлари эса вилоятдаги жанглар давом этаётганини маълум қилди.
Изоҳ (0)