НАТО бош котиби Марк Рютте Истанбулдаги Россия—Украина музокараларида Москва номидан қатнашаётган Россия делегацияси таркибидан норози эканини билдирди. Бу ҳақда Рютте НАТО ташқи ишлар вазирлари раҳбарларининг Анталиядаги норасмий учрашувидан сўнг ўтказилган матбуот анжуманида маълум қилди.
“Россия тинчлик музокаралари учун Туркияга паст даражадаги делегация юборгани кўриниб турибди. Украиналикларнинг айтишича, улар руслар билан бир стол атрофида ўтириб, ўт очишни тўхтатиш бўйича келишишга, дарҳол музокараларни бошлашга, кейинги қадамларни муҳокама қилишга ва бу даҳшатли урушга чек қўйишга тайёр.
Мен америкаликларга ҳеч қандай маслаҳат бермоқчи эмасман. Нима учун? Чунки айнан президент Трамп боши берк кўчадан чиқиш йўлини топди. У ва унинг жамоаси бу вазиятни қанчалик ишонч билан ҳал қилишини кўрамиз. Улар кейинги қадамларни ўйлаб кўради ва иттифоқчилар билан маслаҳатлашади. Аммо тўп уларнинг томонида экани аниқ”, деди у.
Шунингдек, Рютте Россия ва Украинанинг Истанбулдаги музокараларига эҳтиёткорона оптимизм билан қарашини айтган.
“Мен эҳтиёткорлик билан оптимист бўламан. Тўп ҳамон Россия томонида. Агар у ҳам ўйнашни истаса, кейинги бир неча ҳафта ичида баъзи ютуқларга эришиш мумкин”, деб таъкидлади у.
Унинг айтишича, альянс Украинани мудофаа учун зарур бўлган барча нарсалар билан таъминлаш мақсадида уни узоқ муддатли қўллаб-қувватлашга содиқ.
“Биз Украинани узоқ муддатли қўллаб-қувватлашимизни тасдиқладик. Гап можарони қўзғатиш ҳақида эмас, балки Украинани бугун ва келажакда ўзини ҳимоя қилиш имконияти билан таъминлаш ҳақида кетмоқда”, дейди Рютте.
Россия президенти Владимир Путин 15 май куни Истанбулда Украина билан тўғридан тўғри музокараларни бошлашни таклиф қилганди. Украина президенти Владимир Зеленский мазкур музокараларда Путинни шахсан кутишини айтди.
14 май куни Путин музокараларда қатнашадиган Россия делегация таркибини тасдиқлаган. Делегация раҳбари этиб Россия президенти ёрдамчиси Владимир Мединский тайинланган. У 2022 йилда Украина ва Россия делегациялари учрашганида Россия томонидан музокаралар гуруҳи раиси бўлганди.
Шунингдек, Истанбулдаги музокараларда ташқи ишлар вазири ўринбосари Михаил Галузин, Россия Қуролли кучлари Бош штаби бош бошқармаси бошлиғи Игор Костюков ва Россия мудофаа вазири ўринбосари Александр Фомин қатнашади.
Изоҳ (0)