Россия Шимолий Атлантика иттифоқи учун узоқ вақт таҳдид бўлиб қолади.
Бу ҳақда НАТО бош котиби Марк Рютте Шимолий Атлантика альянси штаб-квартирасида ташқи ишлар вазирлари йиғилишидан сўнг ўтказилган матбуот анжуманида маълум қилди.
“Бу мутлақо аниқ ҳақиқат: НАТО учун Россия узоқ муддатли таҳдид, гарчи Украина билан можаро тугаса ҳам. Россияга нисбатан ҳамиша ҳушёр бўлиш керак”, деди у.
Аввалроқ НАТО бош котиби Россия альянснинг бирор давлатига ҳужум қилса, “қақшатқич жавоб” берилишидан огоҳлантирганди.
Агар кимдир хатога йўл қўйиб, Польша ёки бошқа иттифоқчиларимиздан бирига ҳужум жазосиз қолади деб ўйласа, у иттифоқнинг бутун қудратига тўқнаш келади. Бизнинг жавобимиз қақшатқич бўлади. Бу Владимир Путин ва бизга ҳужум қилишга қарор қилганларнинг барчаси учун аниқ бўлиши керак, деди Рютте.
У ушбу баёнотни Варшавада Польша бош вазири Дональд Туск билан ўтказилган қўшма матбуот анжуманида берди. Рютте, шунингдек, АҚШнинг НАТО низомининг 5-моддасида белгиланган коллектив хавфсизлик кафолатларига содиқлигига тўлиқ ишонч билдирди.
Изоҳ (0)