Путин 2-3 йил ичида НАТО давлатларига ҳужум қилиши прогноз қилинди

Россия Ғарб давлатларининг тайёр эмаслигидан фойдаланиб, уларга ҳарбий ҳужум уюштириш учун 4-5 йил кутмаслиги мумкин. Бу ҳақда Берлинда бўлиб ўтган конференцияда Христиан-демократик иттифоқидан Бундестаг депутати Норберт Реттген маълум қилди.

Реттгеннинг фикрича, Москва янги ҳужумни тезроқ амалга ошириши мумкин, эҳтимол, икки-уч йил ичида. Россия президенти Европа давлатлари ўз ҳарбий мақсадларига эриша олмаганидан, АҚШда эса Дональд Трамп ҳокимият тепасида эканидан фойдаланиши сабаб қилиб кўрсатилди:

Биз вақтнинг кучли босими остидамиз ва мудофаа қобилиятимизни зудлик билан яхшилашимиз керак. Чунки вазият расмий баёнотларда айтилганидан кўра тезроқ ёмонлашиши ва хавфлироқ тус олиши мумкин, деди Реттген.

Сиёсатчи НАТОнинг Европа давлатлари мудофаа қобилиятини кучайтиришни тезлаштириши кераклигини айтди. Чунки Россия ҳужумни ҳозирги расмий баёнотларда айтилганидан олдинроқ амалга ошиши мумкин.

Россиянинг бошқа давлатларга эҳтимолий ҳужуми: мавзуга оид янгиликлар

НАТО доираларидаги манбаларга кўра, Россия Финляндия ва НАТОнинг шарқий қанотидаги бошқа давлатларга ҳужум қилиш режасини ишлаб чиққан. Гап Россия армиясининг бир нечта бўлинмаларининг бир вақтнинг ўзида ҳужуми ҳақида кетмоқда. Унга ўн минглаб аскар жалб қилиниши эҳтимоли борлиги айтилган.

Financial Times нашрига кўра, Россия Япония ва Жанубий Корея билан эҳтимолий уруш учун нишонларнинг батафсил рўйхатини тузган. Рўйхатга 160 та ҳарбий ва фуқаролик инфратузилмаси объектлари — атом электр станциялари, кўприклар, заводлар ва қўмондонлик пунктлари киритилган. 2008–2014 йиллардаги махфий ҳужжатлар Х-101 ракеталари билан зарбалар беришни ва Япония ҳамда Жанубий Кореянинг ҳаво мудофаасини текширишни тасвирлайди.

Европа дипломатияси раҳбари Кая Каллас Россия 2028 йилдаёқ Европа иттифоқига ҳужум қилиши мумкинлигини айтиб, Европани мудофаа харажатларини оширишга чақирган. НАТО билан уруш 4-6 йилдан кейин бўлиши мумкинлиги таъкидланган.

Буюк Британия Россия ҳужумига тайёргарлик кўришни бошлади. Лондонда 2005 йилдан бери илк бор фавқулодда ҳолатдаги ҳаракатлар режаси қайта кўриб чиқилмоқда. У ядровий ҳужумга реакция ва бункерлардан фойдаланиш тартибини ўз ичига олади.