НАТО бош котиби Марк Рютте Россия альянснинг бирор давлатига ҳужум қилса, “қақшатқич жавоб” берилишидан огоҳлантирди. Бу ҳақда Associated Press хабар берди.
Агар кимдир хатога йўл қўйиб, Польша ёки бошқа иттифоқчиларимиздан бирига ҳужум жазосиз қолади деб ўйласа, у иттифоқнинг бутун қудратига тўқнаш келади. Бизнинг жавобимиз қақшатқич бўлади. Бу Владимир Путин ва бизга ҳужум қилишга қарор қилганларнинг барчаси учун аниқ бўлиши керак, деди Рютте.
У ушбу баёнотни Варшавада Польша бош вазири Дональд Туск билан ўтказилган қўшма матбуот анжуманида берди. Рютте, шунингдек, АҚШнинг НАТО низомининг 5-моддасида белгиланган коллектив хавфсизлик кафолатларига содиқлигига тўлиқ ишонч билдирди.
Ҳозир Европа учун ҳам, Шимолий Америка учун ҳам якка тартибда ҳаракат қилиш вақти эмас. Замонавий глобал хавфсизлик муаммолари жуда жиддий бўлиб, уларни ёлғиз ҳал қилиб бўлмайди, дея таъкидлади у.
НАТО бош котиби июнь ойида Нидерландияда бўлиб ўтадиган альянс саммитини трансатлантик иттифоқ тарихида янги босқичнинг бошланиши сифатида баҳолади. У НАТО мураккаб геосиёсий вазиятда таҳдидларга самарали жавоб қайтариши учун “янада кучли, адолатли ва ҳалокатли” бўлиши зарурлигини айтди.
Шунингдек, саммитда мудофаа харажатлари бўйича янги мезонлар белгиланади. Ҳозир НАТОга аъзо 23 та давлат мудофаа бюджети учун ялпи ички маҳсулотнинг камида 2 фоизини ажратиш мажбуриятини бажармоқда, бироқ Рюттенинг сўзларига кўра, янги мақсад “3 фоиздан анча юқори” бўлиши мумкин.
Февраль ойида Дания ҳарбий разведкаси яқин 5 йил ичида Европада “кенг кўламли уруш” эҳтимоли ҳақида огоҳлантирувчи ҳисоботни эълон қилди. Вазирлик ҳисоб-китобларига кўра, агар Россия НАТОни ҳам ҳарбий, ҳам сиёсий жиҳатдан заиф деб ҳисобласа, у альянснинг бир ёки бир нечта давлатига қарши куч ишлатишга қарор қилиши мумкин.
Россиянинг бошқа давлатларга эҳтимолий ҳужуми: мавзуга оид янгиликлар
НАТО доираларидаги манбаларга кўра, Россия Финляндия ва НАТОнинг шарқий қанотидаги бошқа давлатларга ҳужум қилиш режасини ишлаб чиққан. Гап Россия армиясининг бир нечта бўлинмаларининг бир вақтнинг ўзида ҳужуми ҳақида кетмоқда. Унга ўн минглаб аскар жалб қилиниши эҳтимоли борлиги айтилган.
Financial Times нашрига кўра, Россия Япония ва Жанубий Корея билан эҳтимолий уруш учун нишонларнинг батафсил рўйхатини тузган. Рўйхатга 160 та ҳарбий ва фуқаролик инфратузилмаси объектлари — атом электр станциялари, кўприклар, заводлар ва қўмондонлик пунктлари киритилган. 2008–2014 йиллардаги махфий ҳужжатлар Х-101 ракеталари билан зарбалар беришни ва Япония ҳамда Жанубий Кореянинг ҳаво мудофаасини текширишни тасвирлайди.
Европа дипломатияси раҳбари Кая Каллас Россия 2028 йилдаёқ Европа иттифоқига ҳужум қилиши мумкинлигини айтиб, Европани мудофаа харажатларини оширишга чақирган. НАТО билан уруш 4-6 йилдан кейин бўлиши мумкинлиги таъкидланган.
Изоҳ (0)