Европа иттифоқи мамлакатларида ҳозирча Украина хавфсизлигини таъминлаш ва Россиянинг эҳтимолий тажовузига қарши туриш учун етарлича қурол захиралари йўқ. Бу ҳақда Германиянинг Rheinmetall қурол-яроғ компанияси раҳбари Армин Паппергер маълум қилди.
Паппергернинг сўзларига кўра, бундай ҳолат Европанинг ўнлаб йиллар давомида мудофаага минимал маблағ сарфлагани ва тегишли харажатларни ялпи ички маҳсулотнинг 1 фоизи даражасида ушлаб туришни нормал деб билгани натижасидир.
Европаликлар ва украиналикларнинг омборларида ҳеч нарса йўқ, деди қурол-яроғ компанияси раҳбари.
У бунинг оқибатида АҚШ Европа мамлакатларига “болалар”дек муносабатда бўла бошлаганини айтди.
Агар ота-оналар кечки овқатни тановул қилса, болалар бошқа столда ўтириши керак. АҚШ Россия билан музокаралар олиб бормоқда ва ҳеч бир европалик стол атрофида ўтирмаяпти. Европаликлар болалар экани аниқ бўлди, дея тушунтирди Rheinmetall раҳбари.
Шу билан бирга, у АҚШ президенти Дональд Трамп Россияни Украинада “ўт очишни тўхтатишга” мажбур қила олишига шубҳа қилди. Аммо бу ҳолатда ҳам, Паппергернинг сўзларига кўра, унинг компанияси ютишда давом этади, чунки Европа қурол ишлаб чиқаришга сармоя киритади.
Агар (Россия-Украина) уруши тўхтаса ҳам, бизни жуда тинч келажак кутмоқда деб ўйлаш нотўғри бўлади, деди Паппергер.
Financial Times маълумотларига кўра, 2021 йилдан 2024 йилгача бўлган даврда Европа иттифоқи мамлакатларининг умумий мудофаа харажатлари 30 фоиздан кўпроққа ошган ва 326 миллиард еврони ёки блок ялпи ички маҳсулотининг тахминан 1,9 фоизини ташкил этган. Европа иттифоқининг энг йирик иқтисодиёти бўлган Германия 2024 йилда ялпи ички маҳсулотининг тахминан 2 фоизини мудофаага йўналтирди. Шу билан бирга, Трамп НАТО давлатлари мудофаага ЯИМнинг камида 5 фоизини сарфлашини талаб қилган.
Rheinmetall — Украинадаги урушда қўлланадиган 155 миллиметрли артиллерия снарядларининг энг йирик немис ишлаб чиқарувчиларидан бири. Концерн Киевга танклар, пиёдалар жанговар машиналари ва бошқа техникаларни ҳам етказиб берган. Бундан ташқари, компания Украинада мудофаа заводини очган.
НАТО Россия ҳукумати Паппергерни ўлдиришни режалаштирганини маълум қилганди. Германиянинг Focus нашрига кўра, Россия президенти Владимир Путин 2024 йил баҳорида ҳарбийлар билан учрашувда Rheinmetall раҳбарини “уруш провокатори” деб атаган.
Изоҳ (0)