Буюк Британия иттифоқчилар билан муҳокама қилинаётган режалар доирасида Украинага 5 йилга қўшин киритиш имкониятини кўриб чиқмоқда. Бу ҳақда The Telegraph хабар берди.
Ҳарбий раҳбарлар Россиянинг навбатдаги босқинига йўл қўймаслик учун Украина армиясини тайёрлашга ва қайта тиклашга ёрдам бермоқчи. Британия ва Франция томонидан муҳокама қилинаётган вариантлар орасида Украинага “Европа бошчилигидаги кучларни” юбориш ҳам бор.
Украина ҳудудига айнан қанча ҳарбий жойлаштирилиши номаълум. Европа давлатларининг фикрича, бу дастлабки босқичда Россияни тинчлик шартномасини бузишдан сақлаб қолади. Қуруқликдаги қўшинларни жўнатишдан ташқари, Украинанинг ҳаво ва денгиз ҳудудини ҳимоя қилиш ҳам режалаштирилмоқда. Бунинг учун қандай чоралар кўрилишига аниқлик киритилмаган. Қўшинларни олиб чиқиш босқичма-босқич амалга оширилиши режалаштирилган.
10 апрель куни Европа давлатлари мудофаа вазирлари Украинада қўшинларни жойлаштириш эҳтимоли бўйича музокаралар ўтказди. Коалиция кучлари муҳим инфратузилма объектлари хавфсизлигини таъминлаши кутилмоқда. Ҳозирча 30 та давлатдан фақат олтитаси ҳарбийларни юборишга рози бўлган.
Россия НАТО давлатлари аскарларининг Украинада жойлаштирилишига рози бўлмаслигини бир неча бор таъкидлаган. Россия ташқи ишлар вазири ўринбосари Александр Грушко “Известия” нашрига берган интервьюсида буни қайта тасдиқлаган. У ўт очиш тўхтатилганда НАТО ва Европа Иттифоқи давлатларидан Украинага тинчликпарвар контингент юборилиши “ўринсиз ва бемаъни” деб ҳисобланишини билдирган.
Россия учун НАТО контингентлари Украина ҳудудида қандай ном остида жойлаштирилиши — Европа Иттифоқи, НАТО ёки миллий сифатида бўлиши — мутлақо аҳамиятсиз. Агар улар у ерда пайдо бўлса, бу уларнинг можаро зонасига жойлаштирилганини ва ушбу контингентлар учун можаро томони сифатида барча оқибатларни келтириб чиқаришини англатади, деган Грушко.
Британия бош вазири Кир Стармернинг вакили Россия томонидан ўт очилган тақдирда тинчликпарвар контингентга ўқ узишга рухсат бериладими, деган саволга шундай жавоб берган:
Эслатиб ўтиш жоизки, Россия қўшинларини киритаётганда Украинадан сўрамаган эди. Биз тезкор режалаштириш бўйича йиғилишлар ўтказмоқдамиз, деб қўшимча қилди у.
Изоҳ (0)