Дания ва Германия ўртасида Балтика денгизи остида 18 километрлик рекорд даражадаги модулли туннел қурилмоқда. 7,4 миллиард доллар қийматидаги лойиҳа йўл-вақтини сезиларли даражада қисқартиради ва Скандинавияни Марказий Европа билан яхшироқ боғлаш имконини беради. Бу ҳақда Baltic News Network портали хабар бермоқда.
Таъкидланишича, объект дунёдаги энг узун модулли автомобиль ва темир йўл туннели бўлади. У олдиндан йиғилган, денгиз тубига жойлаштирилган ва бир-бирига улаб қурилган улкан қисмлардан иборат. Лойиҳанинг асосий қурилиш майдони Даниянинг жануби-шарқидаги Лолланд ороли қирғоғида, туннелнинг шимолий кириш қисмида жойлашган. Участка майдони 500 гектардан ортиқ бўлиб, туннел бўлимлари ёки элементлари учун порт ва ишлаб чиқариш мажмуасини ўз ичига олади.
Даниянинг Femern давлат компанияси директори Хенрик Винсенценнинг айтишича, сув ости туннеллари илгари ҳам қурилган, аммо ҳеч қачон бундай кўламда бўлмаган. Ҳар бирининг узунлиги 217 метр, эни 42 метр бўлган элементлар темир-бетондан тайёрланиб, бетон билан биргаликда қуйилади. Улар Lego ғиштчалари каби қисмларга бўлиниб бирлаштирилади.
Қурилиш ишлари 2029 йилда якунланиши режалаштирилган. Туннел ишга тушса, Даниядаги Редбихавн ва Германиядаги Путтгартен ўртасидаги 45 дақиқалик паром саёҳати ўрнига, йўл машинада атиги 10 дақиқа ёки поездда етти дақиқа давом этади. Ғарбий Данияни четлаб ўтадиган янги темир йўл йўналиши, шунингдек, Копенгаген ва Гамбург ўртасидаги йўл вақтини икки баравар — беш соатдан 2,5 соатгача қисқартиради ҳамда юк ва йўловчи ташиш учун янада экологик тоза ва қисқа муқобил вариант бўлади. Туннел бўйлаб ҳар куни 100 дан ортиқ поезд ва 12 минг автомобиль ҳаракатланиши кутилмоқда.
Лойиҳа асосан Дания томонидан молиялаштирилади. Еврокомиссия тахминан 1,3 миллиард евро ажратади.
Изоҳ (0)