Германия Дания билан биргаликда Украинага яна 10 та Leopard танкини етказиб берди

Германия Дания билан қўшма лойиҳа доирасида Украинага 10 та Leopard 1А5 танкларини етказиб берди. Бу ҳақда Германия ҳукумати сайтида хабар берилди.

Ҳарбий ёрдам пакетига, шунингдек, 54 та “Вектор” ва Heidrun разведкачи дронлари, 8,5 мингта 155 мм артиллерия снарядлари ва Leopard-2, Dachs танклари ҳамда Marder пиёда жанговар машиналари учун 20 та МG3 пулемётлари киради.

Бундан ташқари, хабар қилинишича, учта HIMARS ракета тизими ҳам Киевга етказиб беришга тайёрланмоқда.

Аввалроқ Германия ташаббуси доирасида Украина ҳаво ҳужумидан мудофаа кучларини қўллаб-қувватлаш учун деярли 1 миллиард евро йиғилгани маълум қилинганди.

Шунингдек, 2025 йилда Германия Мудофаа вазирлиги Киевга ёрдам бериш учун ҳукуматдан рекорд миқдорда 15 миллиард евро сўраши мумкинлиги хабар берилган.