Дунё ва ўзбек спортига оид 29 июнь тонгининг муҳим хабарлари дайжести билан танишинг.
Ўзбекистон Суперлигасининг 11-туридан ўрин олган баҳслар ўз якунига етди.
Евро—2020 ҳақида
28 июнь куни 1/8 финал доирасидаги иккита ўйин бўлиб ўтди. Испания терма жамоаси қўшимча бўлимларгача борган ўйинда Хорватияни мағлуб этди (5:3). Франция эса пенальтилар сериясида Швейцарияга ютқазиб қўйди (3:3, 4:5).
Испания терма жамоаси Евро—2012 дан бери илк бор чорак финалга чиқди, Хорватия эса Евро—2008 дан кейин биринчи марта нимчорак финалда юришини тўхтатди. Испания Евро тарихида илк бор кетма-кет икки ўйинда 3+ гол урди.
Испанлар дарвозабони Унаи Симон жамоадоши Педрининг 45 метр масофадан берган узатмасини тўхтатишда хатога йўл қўйди ва тўп дарвозадан жой олди. Бу — Евро тарихидаги энг узун масофадан урилган автогол. Умуман олганда Евро—2020 да шу вақтгача 9 та автогол қайд этилди. Бунга қадар барча Европа чемпионатида умумий шунча автогол қайд этилганди.
Франция ва Швейцария ўртасидаги ўйинда Евро—2020 даги дастлабки пенальтилар серияси бўлиб ўтди. Килиан Мбаппе сўнгги зарбада адашди ва Франция мусобақа билан хайрлашди. Французлар йирик мусобақаларда кетма-кет иккинчи марта пенальтилар сериясида ютқазди. Бундан аввал жамоа ЖЧ—2006 финалида Италияга имкониятни бой берганди. Швейцария эса йирик мусобақада илк бор пенальтилар сериясини ғалаба билан якунлади.
Карим Бензема Франция терма жамоаси сафида кетма-кет иккита ўйинда 2+ гол урган Мишел Платинидан кейин илк футболчига айланди. Бу голлар орқали Бензема Франция термаси тўпурарлари рўйхатида Зинедин Зиданга етиб олди (31 тадан гол). Бу ўйинда Пол Погба ҳам ўз ҳисобига гол ёздириб қўйди. Погба Франция сафида кетма-кет тўртта йирик мусобақада гол урган илк футболчи бўлди.
Шу тариқа Евро—2020 да учта чорак финал жуфтликлари маълум бўлди:
- Дания — Чехия
- Италия — Бельгия
- Испания — Швейцария
Бельгияда катта йўқотишлар
Португалияни базўр енгиб, чорак финалга чиққан Бельгия амалдаги чемпионга қарши ўйинда икки етакчисини йўқотди. Кевин де Брюйне ва Эден Азар жароҳат олиб, майдонни тарк этди. Бу икки футболчи мусобақага кичик шикастланишлар билан келган ва дастлабки учрашувларда тўлиқ ҳаракат қилмаганди.
Америка Кубогида чорак финал жуфтликлари маълум
Бразилия майдонларида ўтаётган Копа Америка—2021 нинг гуруҳ босқичи якунланди. Унга кўра чорак финал жуфтликлари маълум бўлди.
- Перу — Уругвай
- Бразилия — Чили
- Уругвай — Колумбия
- Аргентина — Эквадор
Сўнгги турда Лионель Месси Аргентина сафида дубль қайд этди. Бу Лео учун терма жамоаси сафида 2019 йилдан кейинги илк дубль бўлди. Ушбу баҳсда Месси Аргентина терма жамоасидаги 148-ўйинини ўтказиб, бу борада Хавьер Маскеранонинг рекордини (147) янгилади. Аргентина кетма-кет 17 ўйиндан бери ютқазмаяпти, бу жамоа тарихидаги учинчи энг яхши натижа ҳисобланади.
Трансфер янгиликлари
«Бавария» иккинчи дарвозабон Александр Нюбелни «Монако»га икки йилга ижарага берди. Мюнхенликлар собиқ дарвозабони Свен Ульрайх эса эркин агент мақомида жамоага қайтди.
«Бавария» «Реал»ни эркин агент сифатида тарк этган Серхио Рамосга қизиқиш билдирмоқда, дея хабар қилмоқда ESPN. Бироқ Рамоснинг немис клуби сафига ўтишига мураккаб адаптация жараёни ва тил билмаслик халал бериши мумкин.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)