АҚШ парранда гриппи туфайли тухум тақчиллиги кучайиб бораётган бир пайтда, Европа мамлакатларидан, жумладан, Финляндиядан эҳтимолий ёрдам сўради. Бу ҳақда Ylе хабар берди.
Бироқ Финляндия Паррандачилик уюшмаси ижрочи директори Веера Леҳтиланинг таъкидлашича, Ҳелсинкининг АҚШга тухум етказиб бериши даргумон. Сабаби Вашингтон билан бу борада ҳеч қандай экспорт келишуви мавжуд эмас.
Келишилган қоидалар бўлмаса, экспортни бошлаш осон эмас, деди Леҳтила.
Шунингдек, у Финляндия тухум экспортини йўлга қўйган тақдирда ҳам, бу АҚШдаги тақчиллик муаммосини ҳал қила олмаслигини қайд этди. Бундан ташқари, парранда гриппи фақат АҚШдагина эмас, балки Европада ҳам муаммо бўлиб қолаётганини эслатиб ўтди.
Ҳозирча Финляндия бу вазиятни яхши бошқармоқда, аммо инфекциянинг олдини олиш учун доимий саъй-ҳаракатлар талаб этилади, дея қўшимча қилди Леҳтила.
Даниянинг Agriwatch журнали маълумотларига кўра, АҚШ Дания, Швеция ва Нидерландияга ҳам тухум етказиб бериш бўйича сўров юборган.
Улар биздан тухум етказиб бера оламизми ва қандай ҳажмда, деб сўрашди, деди Леҳтила.
Бироқ Швециянинг Kronäggs компанияси Қўшма Штатларга тухум экспорт қилиш эҳтимоли жуда пастлигини маълум қилди. Бунинг сабаби сифатида турли экспорт чекловлари ва Европанинг ўзида ҳам тухум танқислиги борлиги кўрсатилди.
АҚШда тухум нархи рекорд даражага етди
Аввалроқ АҚШ тухумни асосан Канададан импорт қилган. Аммо президент Дональд Трамп эълон қилган савдо уруши туфайли бу жараён сезиларли даражада қисқарган.
2024 йилнинг сўнгги чорагида парранда гриппи эпидемияси оқибатида АҚШда 20 миллиондан ортиқ тухум қўювчи товуқ нобуд бўлди. Бу эса тухум нархининг кескин ошишига ва дўконларда тақчиллик юзага келишига сабаб бўлди.
АҚШ Қишлоқ хўжалиги вазирлиги маълумотларига кўра, 2024 йил февраль ойи охирида Ўрта Ғарб штатларида 12 дона тухумнинг ўртача нархи 8,41 долларга етди. Бу ўтган йилга нисбатан 200 фоиздан кўпроққа ошган.
Нархларнинг кескин кўтарилиши туфайли АҚШ Адлия вазирлиги тухум бозори бўйича тергов бошлади. Bloomberg хабарига кўра, расмийлар Cаl-Maine Foods ва Rose Acre Farms каби йирик ишлаб чиқарувчилар нархларни сунъий ошириш ва маҳсулот етказиб беришни чеклаш орқали тил бириктирган-бириктирмаганини текширмоқда.
Изоҳ (0)