УЕФА Миллатлар Лигаси чорак финал жавоб баҳслари доирасидаги Португалия — Дания ўртасидаги беллашув 23 март, якшанба куни бўлиб ўтди. Унда майдон эгалари 5:2 ҳисобида ғалаба қозониб (умумий ҳисоб — 5:4), ярим финал йўлланмасига эга чиқди. Португалиялик ҳужумчи Криштиану Роналду жамоасининг ўйиндаги 2-голини киритиб, ғалаба учун ўз ҳиссасини қўшди.
Шу тариқа, 40 ёшли футболчи фаолиятидаги 929, терма жамоадаги 136-голини киритди. Шунингдек, Роналду миллий жамоа сафида кетма-кет 22 йил давомида гол урган тарихдаги илк футболчига айланди.
Криштиану 6-дақиқада пенальтидан фойдалана олмади. Унинг Каспер Шмейхель дарвозасига тепган 11 метрлик жарима тўпи фаолиятидаги 205-пенальти сифатида қайд этилди. Футболчи ушбу жарима зарбаларининг 173 мартасини аниқ амалга оширган бўлса, 32 марта нуқтадан адашган.
Аввалроқ футболчи фаолиятини якунлашга қадар 1000 та гол урмоқчи эканлиги ҳақида гапирган эди:
Мен 1000 та гол уришни мақсад қилганман, лекин бошқалардан фарқ шундаки, мен киритган барча голлар видеоёзувлар билан тасдиқланган.
Ҳужумчи ушбу тарихий натижани қайд этиш учун яна 71 та гол уриши талаб этилади.
Маълумот учун, Португалия ярим финал учрашувини Германияга қарши ўтказади. Ушбу беллашув 4 июнь куни бўлиб ўтади.
Изоҳ (0)