World economic forum нашри глобал энергия муаммолари ҳақида ҳисобот эълон қилди. Унда дунё мамлакатлари дуч келаётган энергия муаммолари ва уларни бартараф этиш учун амалга оширилаётган чоралар ҳақида сўз юритилади.
Нашр ёзишича, Испаниянинг Cepsa нефть компанияси мамлакат жанубидаги Андалусияда амалга ошириладиган яшил водород лойиҳасига 3,1 миллиард доллар сармоя киритмоқчи. Яшил водород ёки қайта тикланадиган энергиядан ишлаб чиқарилган водород оғир транспортни карбонсизлантириш учун ечим сифатида кўриб чиқилмоқда.
Финляндия энергетика идораси эса мамлакатда маҳаллий ишлаб чиқариш ва хориждан импорт қилишдаги ноаниқликлар туфайли электр энергиясида қисқа узилишлар хавфи ортганини маълум қилган. Бундан ташқари миллий тармоқ оператори Фингрид янги Олкилуото 3 атом энергетикаси реакторининг ишга туширилиш санаси номаълумлиги сабаб бу қишда электр энергиясидаги эҳтимолий узилишлари ҳақида огоҳлантирган.
Айни пайтда, Францияда ҳам таъминотнинг етарли даражада эмаслиги қишда электр энергиясининг узилишига олиб келиши мумкин. «Вазият хавф-хатарларни келтириб чиқаради, аммо электр узилиши муқаррар деган хавотирга бормаслик керак», — деди француз энергия регулятори RTЭ раҳбари Ксавер Печачик.
Британиянинг British Gas компанияси жорий йилнинг қиш мавсумида энергияни қисқартириш режасини ишга туширмоқда, унга кўра, мижозлар одатдаги истеъмолига нисбатан тежаган электр энергиясининг ҳар бир бирлиги учун ҳақ олади. «Peak Save» деб номланган режа 2022 йил декабридан 2023 йилнинг мартигача амал қилади ва қишда мижозларга 100 фунт стерлинг (119,92 доллар) тежаш имконини беради, дейилади British Gas баёнотида.
Қуйидаги жадвалда Иқтисодий ҳамкорлик ва тараққиёт ташкилотига аъзо давлатларда сўнгги йилларда энергия нархи инфляциясининг қандай ўзгаргани акс этган.
Норвегия, Дания ва Польшадаги газ тизимларини боғловчи, Европанинг энергия таъминоти хавфсизлигини оширувчи Болтиқбўйи қувури 30 ноябрь куни тўлиқ қувватда ишлашга ўтди, деб хабар беради Даниянинг Energinet энергетика компанияси.
30 ноябрь куни нефть нархи кескин кўтарилиб, бир баррель учун 2 доллардан ошиб кетди. Бунга етказиб беришнинг қисқариши, доллар курсининг пасайиши ва Хитойда нефтга талабнинг тикланишига некбинлик кўрсатилиши каби омиллар сабаб бўлди. ОПЕК+ нинг 4 декабрдаги йиғилишида нарх ошишини чеклаб қўйиш тўғрисида қабул қилинган қарор амалда сиёсат ўзгариши эҳтимоли камлигидан далолат беради, деди Reuters манбалари.
Германия ва Норвегия раҳбарлари Шимолий оқим газ қувурлари тармоғига ҳужумлар муносабати билан 30 ноябрь куни НАТОдан Европанинг денгизости инфратузилмасини ҳимоя қилишни биргаликда мувофиқлаштиришни сўраганди.
Европа Иттифоқининг энергетика бўйича раҳбари 30 ноябрь куни иттифоқнинг газ нархларини чеклаш бўйича таклифини ҳимоя қилди ва Европа Иттифоқига аъзо давлатларнинг норозилигидан кейин мамлакатлар таклифга ўзгартириш киритиш бўйича музокара олиб боришини айтди.
Миср ҳукумати Бирлашган араб амирликларининг AMEA Power фирмаси билан умумий қуввати бир гигаваттдан (ГВт) ортиқ бўлган қуёш парки ва шамол станциясини қуриш бўйича 1,1 миллиард долларлик келишувни якунлади.
АҚШ шамол энергиясини ишлаб чиқариш ва узоқ муддат сақлашда солиқ имтиёзларини жорий қилди
АҚШнинг Инфляцияни камайтириш тўғрисидаги қонунида (IRA) энергияни сақлаш учун янги солиқ имтиёзлари энергияни узоқ муддатли сақлаш (LDES) бизнес моделини кучайтиради, бу эса энергия тизими таркибидан қазиб олинадиган ёнилғиларни чиқариб ташлаш учун жуда муҳим аҳамиятга эга.
IRA шамол ва қуёш энергиясини ишлаб чиқарувчилар учун солиқ имтиёзларини ўн йилга узайтиради, ишлаб чиқаришни биринчи марта бошлайдиган компаниялар эса энергияни йиғиш, сақлаш ва шамол лойиҳалари учун инвестиция олишда солиқ имтиёзларига (ITC) эга бўлиши мумкин. Илгари ITC’лар фақат қуёш панелларини сақлаш учун бериларди.
Африканинг энергияга ўтиш имкониятларини амалга ошириш учун кўпроқ маблағ керак
Африканинг тоза ёнилғи ва энергия ишлаб чиқаришга ўтиши барча қиймат занжири бўйлаб инвесторлар учун имкониятлар яратади, бироқ лойиҳалар кўпроқ тўғридан-тўғри молиялаштиришни талаб қилади.
African Rainbow Energy & Power компаниясининг бош ижрочи директори Брайан Дамеснинг таъкидлашича, тоза энергияга ўтиш, масалан, Жанубий Африка республикасида, катта ўсиш потенциалига эга янги ишлаб чиқариш қувватларини оммавий бирлаштиришни англатади.
Африканинг энг саноати ривожланган мамлакати ЖАР бу йил рекорд даражадаги электр узилишларни бошдан кечирмоқда, чунки мамлакат ишлаб чиқариш қувватининг 70 фоиздан ортиғини (тахминан 58 000 МВт) ташкил этувчи беқарор кўмир электр станциялари талабни қондириш учун бор кучи билан ишламоқда.
Қайта тикланадиган энергия манбалари халқаро агентлигининг маълумотларига кўра, 2030 йилга келиб бутун дунё бўйлаб қайта тикланадиган энергия манбаларидан 4,5 миллионгача автоном иш ўрни яратилиши мумкин. Аммо тоза энергетика сектори келгуси йилларда ҳақиқий талантлар етишмаслигидан азият чекади, чунки қайта тикланадиган энергия тажрибасига эга бўлган ишчиларга талабнинг тез ўсиши таъминот билан мос келмайди.
Изоҳ (0)