АҚШнинг Гренландияни сотиб олиш бўйича дастлабки таклифи тахминан 2,2 миллиард долларни ташкил этиши мумкин. Бу ҳақда Newsweek журнали ўз ҳисоб-китобларига асосланиб хабар бермоқда.
Нашр АҚШнинг 33-президенти Гарри Труменнинг 1946 йилда оролни 100 миллион долларга сотиб олиш таклифини асос қилиб олди ва бугунги кунда инфляцияни ҳисобга олган ҳолда бу сумма 1,6 миллиард долларга тенг бўлишини аниқлади. Журнал бу маблағга Дания ҳар йили оролга ажратадиган 600 миллион долларни қўшди ва шундай қилиб, АҚШнинг Гренландияни сотиб олиш бўйича потенциал таклифининг умумий миқдори 2,2 миллиард долларни ташкил этди. Кейинчалик эса ҳар йиллик ажратмалар билан тўлдирилиши кўзда тутилган.
АҚШ президенти Дональд Трамп илгари Гренландия унинг мамлакатига қўшилиши кераклигини бир неча бор айтган эди. У агар Дания оролдан воз кечмаса, унга қарши юқори савдо божларини жорий қилиш билан таҳдид қилди. Трамп биринчи президентлик муддатидаёқ Гренландияни сотиб олишни таклиф қилганди. Дания ва Гренландия ҳукуматлари бу ғояни қатъиян рад этиб келмоқда.
Гренландия автоном ҳудуд сифатида Дания таркибига киради. 1951 йилда Вашингтон ва Копенгаген НАТО бўйича иттифоқчилик мажбуриятларига қўшимча равишда Гренландияни ҳимоя қилиш тўғрисидаги шартномани имзолади. Унга кўра, АҚШ оролни ташқи тажовуздан ҳимоя қилиш мажбуриятини олди. Оролда Американинг Pituffik космик базаси жойлашган бўлиб, у ракета ҳужумидан огоҳлантириш ва Арктика ҳудудини назорат қилиш тизими вазифаларини бажаради.
Изоҳ (0)