АҚШ Мудофаа вазирлиги Гренландиядаги Питуффик ҳарбий базаси қўмондони, полковник Сузанна Мейерсни лавозимидан озод қилди. Пентагон вакилига кўра, бу қарор президент Дональд Трампнинг сиёсий курсига қарши ҳаракатлар фонида қабул қилинган.
Занжирли бошқарувга путур етказувчи ҳаракатлар ёки президент Трампнинг кун тартибини саботаж қилишга уринишларга йўл қўйилмайди, деди АҚШ Мудофаа вазирлиги матбуот котиби Шон Парнелл баёнот бериб.
Полковник Мейерснинг лавозимдан олиниши билан боғлиқ расмий сабаб кўрсатилмаган, аммо Пентагон эълон билан бирга Military.com мақоласига ҳавола берган. Унда полковник Сузанна Мейерснинг АҚШ вице-президенти ЖД Венс ташрифидан сўнг базадаги ходимларга юборган электрон хати ҳақида сўз боради.
Маълумотларга кўра, Мейерс 31 март куни базадаги ҳарбийларга электрон хат юбориб, вице-президентнинг уч кун аввалги ташрифидан норози эканини билдирган.
Мен сиёсатни чуқур тушунмайман, аммо Венс жанобнинг гаплари Питуффик базасининг руҳини акс эттирмайди. Раҳбар бўлиб турар эканман, бу ерда барча байроқлар ёнма-ён ҳилпирайди, деб ёзган у ўз мамлакатининг Гренлайдияга даъволарига ишора қилиб.
Аввалроқ вице-президент ЖД Венс 28 март куни АҚШ делегациясига бошчилик қилиб, Қўшма Штатларнинг Гренландиядаги Питуффик ҳарбий базасига ташриф буюрди. У оролни Даниядан ажратиб, АҚШ назоратига ўтказиш кераклигини айтган. Венсга кўра, ҳудуднинг Хитой ва Россия таҳдидига қарши хавфсизлигини АҚШ таъминлаши лозим.
Трамп маъмурияти Гренландияни АҚШ назоратига ўтказиш бўйича бир неча бор баёнот берган. Дания эса бу даъволарни кескин рад этмоқда.
АҚШга жавоб
Дания ташқи ишлар вазири Ларс Локке Расмуссен Трамп маъмуриятининг оҳангини танқид қилди. Гренландиянинг янги бош вазири Йенс-Фредерик Нилсен эса шундай деди:
Гренландия сотилмайди. Трампнинг бу ёндашуви бизнинг сиёсий мустақиллигимизга таҳдиддир.
Томонлар ўртасидаги вазият вақти-вақти билан кескин нуқтага чиқмоқда. Оқ уй эса орол бўйича даъволаридан воз кечгани йўқ.
Изоҳ (0)