Эрон ўзининг ядровий дастурини чеклаш учун АҚШга бир қанча шартлар қўйди. Томонлар 12 апрель куни Уммонда билвосита музокаралар олиб борди. Бу ҳақда The Wall Street Journal хабар берди.
Шартларга кўра, Америка Эрон атом секторига қарши санкцияларини юмшатиши, хориждаги миллиардлаб долларлик музлатилган активларни блокдан чиқариши керак. Эрон нефтини сотиб олаётган Хитой компанияларига нисбатан босимни тўхтатиш ҳам талаб қилинган.
Бунинг эвазига Теҳрон 2015 йилда имзоланган ядровий келишув доирасида белгиланган уранни бойитиш даражасига қайтишга тайёр. Мазкур келишувни АҚШнинг собиқ президенти Дональд Трамп ўзининг биринчи президентлик даврида бекор қилган эди.
Таъкидланишича, Теҳрон қўшимча мажбуриятлар олмаса, Вашингтон санкцияларни юмшатишга рози бўлиши даргумон. Трамп маъмурияти ҳозирча Эроннинг янги келишув доирасида уранни бойитиш ҳуқуқини сақлаб қолишига қарши.
Бироқ бу музокараларда АҚШ максималистик талабларни илгари сурмади, балки республика ўзидаги мавжуд материални қуролга айлантирмаслигига эътибор қаратди, дейилади хабарда.
Эрон ташқи ишлар вазири Аббос Арақчи мулоқотни “конструктив” деб атаган. Унинг сўзларига кўра, муҳокама “ўзаро ҳурмат билан” олиб борилган.
Менимча, биз музокаралар учун асос яратишга жуда яқин турибмиз. Агар кейинги ҳафтада шу асосни тўлиқ ишлаб чиқишга муваффақ бўлсак, реал мунозарани бошлашимиз мумкин, деган у.
Оқ уй ҳам музокараларни “ижобий ва конструктив” деб баҳолаган.
Бу масалалар жуда мураккаб ва Трампнинг махсус вакил Уиткоффнинг тўғридан-тўғри мулоқоти ўзаро манфаатли натижага эришиш йўлида олдинга ташланган қадам бўлди, дейилади хабарда.
Трампнинг ўзи музокаралар “яхши кетаётганини” таъкидлади, бироқ аниқ натижа бўлмагунча “ҳеч нарса аҳамиятсиз” эканини айтди.
Изоҳ (0)