АҚШ Мудофаа вазирлиги Яқин Шарққа USS Carl Vinson авиаташувчи кемасини жўнатмоқда. Бу ҳақда Пентагон расмий вакили Шон Парнелл маълум қилди.
Мазкур авиаташувчи илгари Қизил денгизда бир неча бор ҳусийлар ҳужумига учраган USS Harry С. Truman авиаташувчисига қўшилади.
Ҳинд-Тинч океани минтақасидаги режали машғулотлар якунлангач, USS Cаrl Vinson бошчилигидаги авиаташувчи зарбдор гуруҳи минтақавий барқарорликни мустаҳкамлаш, тажовузкорликни тўхтатиш ва савдо йўлларининг хавфсизлигини таъминлаш учун АҚШ Марказий қўмондонлиги (CENTCOM) масъул ҳудудга етиб боради, деди Парнелл.
АҚШ президенти Дональд Трамп маъмуриятига яқин манбаларнинг Express газетасига маълум қилишича, агар Эрон ядровий келишувга рози бўлмаса ва ўзининг ядровий дастурини тўхтатишни бошламаса, “сентябрь ойигача мавжуд бўлмай қолиши” мумкин.
Ҳа, президент Трампга фойдали келишув тузиш имкониятини бериш истаги бор, биз ҳам урушдан кўра бундай келишувни афзал кўрамиз. Бироқ ҳарбий вариант ҳамон мавжуд ва қарор қабул қилиш вақти яқинлашмоқда, деди манба.
USS Carl Vinson тўртта ракеталарини ишга тушириш қурилмалари билан жиҳозланган. У 90 тагача самолёт ва вертолёт ташиш имкониятига эга.
Шунингдек, АҚШ аллақачон Буюк Британия назоратидаги Диего-Гарсия оролига (Чагос архипелаги) олтита B-2 Spirit стратегик кўринмас бомбардимончи самолётларини жойлаштирган. Ушбу бомбардимончилар Эроннинг ҳарбий ва ядровий объектларини йўқ қилишга қодир бўлган бункерга қарши ўқ-дориларни олиб юришга қодир.
Уларнинг ҳаракатларини Диего-Гарсия базасидаги олтита Стратотанкер ёнилғи қуйиш самолётлари қўллаб-қувватлаши мумкин. Бу АҚШ ҳарбий-ҳаво кучларига Эронга зарба бериш бўйича узоқ масофали операцияларни амалга ошириш ва дастлабки позицияларга қайтиш имконини беради.
АҚШ президенти таҳдиди ва Эрон жавоби
Трамп март ойи бошида Эрон олий раҳнамосига мактуб йўллаб, унга янги ядровий келишув тузиш учун икки ой муҳлат берган эди. Мактубда янги ядровий битим бўйича музокаралар ўтказиш қатъий талаб қилинган. АҚШ мактуб мазмуни ҳақида бир неча иттифоқчисини, жумладан Исроил, Саудия Арабистони ва Бирлашган Араб Амирликларини ҳам хабардор қилган.
Эрон олий раҳнамоси 12 март куни мактубни олгач, Трампнинг музокаралар ҳақидаги таклифини “алдов” деб атади. 30 март куни эса Эрон президенти Масъуд Пезешкиён мактубга жавобан АҚШ билан икки томонлама музокаралар ўтказишдан бош тортди. Теҳрон Вашингтон билан ядро дастури бўйича мулоқот фақат учинчи давлатлар воситачилигида амалга оширилиши мумкинлигини таъкидлаган.
Икки томон ўртасида тўғридан тўғри музокаралар ўтказиш имконияти рад этилган бўлса-да, билвосита музокаралар учун йўл очиқлиги таъкидланди, деган Эрон президенти
Бунга жавобан Трамп агар келишув бўлмаса, Эронни бомбардимон қилиш билан таҳдид қилди.
Агар улар келишувга эришмаса, унда бомбардимон бўлади. Бу улар ҳеч қачон кўрмаган бомбардимон бўлади, деган АҚШ раҳбари.
Изоҳ (0)