АҚШ президенти Дональд Трамп Оқ уйдаги учрашувдан кейин Исроил бош вазири Биньямин Нетаньяхуни матбуот олдида камситди. Бу ҳақда Исроил оммавий ахборот воситалари хабар берди.
Нетаньяху 7 апрель куни Трампнинг таклифига биноан Вашингтонга ташриф буюрди. Исроил бош вазири музокараларда Ғазодаги вазият, исроиллик гаровга олинганлар ва Эронни муҳокама қилган. АҚШ президенти Нетаньяхуни Оқ уйнинг овал кабинетида қабул қилган ва матбуот учун қўшма баёнот берган.
Исроил матбуотига кўра, Трамп Оқ уйдаги камералар олдида Нетаньяхуни таҳқирлаган. Оқибатда Исроил бош вазири учрашувдан қуруқ қўл билан қайтган.
Walla сайтида эълон қилинган таҳлилий материалда Нетаньяху Вашингтондан ўзи истаган нарсани олмагани таъкидланган.
Жумладан, бош вазир “шармандали ва камситилувчи” вазиятга тушиб қолган ва “Эроннинг ядро дастури, АҚШ божлари ва Туркиянинг Сурияда ўрнатмоқчи бўлган тартиботига оид муҳим масалаларда унга (Трампга) таъсир ўтказиш имкониятидан маҳрум бўлган”.
7 апрелдаги учрашув Исроил бош вазирининг Трамп билан бўлган энг муваффақиятсиз учрашуви сифатида талқин этилмоқда. Хусусан, Нетаньяху шунчаки камералар қаршисида ўтирган, жилмайган ва Трампнинг баёнотларига кўнишга мажбур бўлган.
Дональд Трампнинг ўйинида Нетаньяху оддий томошабин ролини ўйнади. Ярим соатдан ортиқ вақт давомида АҚШ президенти саволларга худди меҳмони суратга олиш майдонининг бир қисми ёки Нетаньяху машҳур видеода айтганидек, гултувакдек ўтиргандек жавоб берди, дейди Walla нашри журналисти Барака Равид.
Нетаньяхунинг “АҚШ билан савдо балансидаги дефицитни бартараф этиш” ваъдаси Трампда таассурот қолдирмаган. АҚШ президенти Исроил бош вазирига ҳарбий ёрдам ҳақида гапириб, танбеҳ берган.
Равиднинг айтишича, февраль ойида бўлиб ўтган учрашувдан фарқли ўлароқ, бу сафар “Нетаньяху тилини ютиб юборгандек” кўринган.
Учрашувнинг парда ортидаги тафсилотларига кўра, Исроил бош вазири Туркиянинг Суриядаги ҳаракатларидан ташвишланган ва АҚШ президентидан туркиялик ҳамкасби Ражаб Тоййиб Эрдўғонга босим ўтказишни сўраган. Бироқ Трамп бу илтимосга эътибор қаратмаган.
Хулоса қилиш мумкинки, Нетаньяху ва Исроил давлати бу учрашувдан ҳеч қандай наф кўрмади, дея якун ясади Равид.
Божлар масаласида Нетаньяху янада камситувчи жавоб олди
Исроилнинг “Едиот Ахронот” газетасидаги таҳлилий материалда қайд этилишича, Нетаньяху Трамп билан шошилинч учрашувдан кейин уйига қуруқ қўл билан қайтган.
Трамп Эрон билан дипломатик музокараларга урғу берган ва Исроил товарларига божхона тўловларини жорий этишда давом этган. Нетаньяхунинг Вашингтонга шошилинч кетишига тарифлар эмас, балки Эрон билан бўлажак музокаралар асосий сабаб бўлган. Трамп Нетаньяхуга эронликлар билан юқори даражадаги музокаралар ҳақида маълумот берган.
АҚШ ва Эрон ўртасидаги тўғридан тўғри музокаралар Нетаньяху эшитишга умид қилган нарса эмас. Бож масаласида Нетаньяху янада камситувчи жавоб олди, деб ёзади мақола муаллифи Итамар Эйхнер.
Исроилнинг Америка товарларига божларни бекор қилиш қарорига қарамай, Трампнинг АҚШ “аллақачон Исроилга кўп ёрдам бераётгани” ҳақидаги баёнотларини инобатга олган ҳолда, АҚШнинг Исроил товарларига божлари ўз кучида қолди. Нетаньяху эса қуруқ қўл билан қайтган.
“Туркиянинг Суриядаги таъсири ортиб бораётгани”га келсак, таъкидланишича, Трамп президент Эрдўғонни ёқтиришини айтган, Исроил ва Туркия ўртасида можаро келиб чиқмаслиги учун воситачилик қилишни таклиф қилган.
Изоҳ (0)