АҚШ 12 апрель куни Эрон билан тўғридан-тўғри ядро дастури бўйича музокараларга киришади. АҚШ президенти Дональд Трамп агар келишув амалга ошмаса, бу “Эрон учун жуда ёмон кун” бўлишини таъкидлади. Бу ҳақда BBC хабар берди.
Эрон ташқи ишлар вазири учрашувни тасдиқлаб, музокаралар “билвосита” ўтказилишини ва бу жараён “синов ва имконият” эканини айтган. Учрашув Уммонда бўлиб ўтиши маълум қилинган.
Трамп ўзининг биринчи президентлик даврида Эрон билан тузилган ядро келишувини бир томонлама бекор қилган эди. Шу сабабли, у таклиф қилаётган янги музокаралар ва битим ҳақида гапирар экан, Эронни шартларни бузмасликка чақирди.
АҚШ ва Эрон ўртасидаги ушбу музокаралар глобал хавфсизликни шакллантиришда муҳим аҳамиятга эга бўлади. Эроннинг ядро фаолиятини чеклаш АҚШ ва унинг иттифоқчилари учун асосий ташқи сиёсий мақсад бўлиб қолмоқда. Трампнинг сўзларига кўра, агар музокаралар муваффақиятли якунланса, бу Эронни катта хавфдан сақлаб қолади.
АҚШ Эронга ҳужум қилиш билан таҳдид қилди
АҚШ президенти Дональд Трамп март ойи бошида Эрон олий раҳнамосига мактуб йўллаб, унга янги ядровий келишув тузиш учун икки ой муҳлат берган эди. Мактубда янги ядровий битим бўйича музокаралар ўтказиш қатъий талаб қилинган. АҚШ мактуб мазмуни ҳақида бир неча иттифоқчисини, жумладан Исроил, Саудия Арабистони ва Бирлашган Араб Амирликларини ҳам хабардор қилган.
Эрон олий раҳнамоси мактубни олгач, Трампнинг музокаралар ҳақидаги таклифини “алдов” деб атаган. Эрон президенти Масъуд Пезешкиён мактубга жавобан АҚШ билан икки томонлама музокаралар ўтказишдан бош тортган. Теҳрон Вашингтон билан ядро дастури бўйича мулоқот фақат учинчи давлатлар воситачилигида амалга оширилиши мумкинлигини таъкидлаган.
Бунга жавобан Трамп агар келишув бўлмаса, Эронни бомбардимон қилиш билан таҳдид қилган. Мазкур таҳдидлар фонида Эрон ракеталарини жанговар шай ҳолатга келтирган. Учиришга тайёр бўлган ракеталарнинг катта қисми бутун мамлакат бўйлаб ҳаво ҳужумларига бардош бера оладиган тарзда лойиҳалаштирилган ерости иншоотларига жойлаштирилган.
Бундан ташқари Оятуллоҳ Али Хоманаий армияни юқори жанговар шай ҳолатга келтиришга кўрсатма берган. Қарор АҚШнинг эҳтимолий ҳарбий операцияси ҳақидаги хабарлар фонида қабул қилингани айтилмоқда. Эрон Iроқ, Кувайт, Бирлашган Араб Амирликлари, Қатар, Туркия ва Баҳрайнга агар улар АҚШга ўз ҳудудидан ҳужум қилишига йўл қўйса, буни душманлик ҳаракати сифатида баҳолаши ва ҳарбий йўл билан жавоб бериши мумкинлиги ҳақида огоҳлантирган
Изоҳ (0)