АҚШ Вакиллар палатасининг бир гуруҳ қонун чиқарувчилари Туркияни Европа эмас, балки Яқин Шарқ мамлакати сифатида тан олиш тўғрисидаги қонун лойиҳасини Конгресс муҳокамасига киритди. Бу ҳақда Fox News хабар берди.
Демократ Бред Шнайдер ва республикачи Гас Билиракис бошчилигидаги қонунчилар гуруҳи Туркиянинг дипломатик мақомини ўзгартириш тўғрисидаги қонунни тақдим этди.
Ҳужжатга кўра, давлат департаменти Туркияни Европа ва Евросиё мамлакатлари қаторига эмас, балки Яқин Шарқ мамлакатлари қаторига киритиши керак. Бу “Анқаранинг Россия, Хитой, Эрон ва ҲАМАС билан тобора чуқурлашиб бораётган алоқаларини акс эттиради, Ғарбнинг хавфсизлик манфаатларига эса тубдан зид”, дейилади материалда.
Туркия чорраҳада турибди, бироқ Эрдўғон ўз танловини қилди. Унинг ҳукумати ҲАМАС жангчиларини яширмоқда, Путиннинг ҳарбий машинасини қўллаб-қувватламоқда ва НАТО бирлигига тўсқинлик қилмоқда, шу билан бирга, Ғарб иттифоқчисининг имтиёзларини талаб қилишда давом этмоқда. Америка дипломатияси ўзини Туркия ҳали ҳам Европанинг бир қисми сифатида кўрсатишни бас қилиши вақти келди, деди конгрессмен Шнайдер.
Билиракис уни қўллаб-қувватлаб, Туркия президенти Ражаб Тоййиб Эрдўғон бир неча бор Америка манфаатларига зид иш тутгани ва бу гўёки минтақадаги беқарорликка ҳисса қўшганини таъкидлади.
АҚШнинг расмий ташқи сиёсатида ушбу душман режимининг хатти-ҳаракатларини очиб берадиган вақт келди, Эрдўғон эса жавобгарликни ўз зиммасига олиши керак, дейилади конгрессменлар баёнотида.
Туркиянинг АҚШдаги элчихонаси бунга жавобан норозилик билдирди.
Туркиянинг Европа идентификацияси инкор этиб бўлмайдиган тарихий ва геостратегик фактдир. НАТО, Европа кенгаши, ЕХҲТнинг кучли аъзоси ва Европа иттифоқининг ассоциацияланган аъзоси сифатида Туркия ушбу институтларни ифодаловчи Европа институционал асослари ва универсал қадриятларнинг ажралмас қисмидир, деди Туркиянинг Вашингтондаги элчихонаси вакили.
Ҳозирча қонун чиқарувчилар томонидан тайёрланган ҳужжат кўриб чиқилмоқда.
Изоҳ (0)