АҚШ Эронга технологияларни етказиб беришда айбланаётган хитойликни қўлга олиш учун 15 миллион доллар мукофот эълон қилди.
Тегишли мукофот АҚШ Федерал қидирув бюроси томонидан илгари сурилган. Хитой фуқароси Чжун Америка электрон компонентларини Хитой ва Гонконг орқали Эронга ноқонуний экспорт қилганликда айбланмоқда. АҚШ Эроннинг Ислом инқилоби гвардияси ва унинг Қудс кучини хорижий террорчи ташкилот деб тан олган.
Федерал қидирув бюросига кўра, товарлар айнан шу ташкилотлар учун етказиб берилган. Улар эса товарлардан ҳарбий техника, жумладан, дронлар, баллистик ракета тизимларини ишлаб чиқаришда фойдалангани айтилмоқда. АҚШ Адлия департаменти 2024 йилда Чжундан ташқари яна уч нафар Хитой фуқаросини Эроннинг дронлар ва ракета тизимлари учун чекланган компонентларни ноқонуний йўли билан сотишда тил бириктирганликда айблаган.
Ислом инқилоби қўриқчилари корпуси дунё бўйлаб кўплаб террорчилик ҳужумлари ва фаолиятларини, жумладан, ҲАМАС, “Ҳизбуллоҳ” ва Ироқдаги Эрон томонидан қўллаб-қувватланадиган ҳарбий гуруҳларни молиялаштирган. Молиялаштириш қисман ҳарбий ускуналар, жумладан, дронларни сотиш орқали амалга оширилади, дейилади Давлат департаменти баёнотида.
АҚШ президенти Дональд Трампнинг айтишича, у икки ҳафта олдин Эрон олий раҳнамоси Али Хоманаийга мактуб йўллаб, Теҳронни ядро қуролини қўлга киритишдан қайтариш мақсадида тўғридан-тўғри музокаралар олиб боришни таклиф қилган.
Изоҳ (0)