Италиянинг машҳур Prada модалар уйи ўзига рақобатчи бўлган йирик бренд — Versace’ни сотиб олиш бўйича келишувга эришди. Бу ҳақда Capri Holdings хабар бермоқда.
1,38 миллиард долларлик шартнома иккала компаниянинг директорлар кенгашлари томонидан тасдиқланган. Музокаралар 2025 йилнинг иккинчи ярмида якунланиши кутилмоқда.
Versace бренди Capri Holdings концернининг таркибига киради, у ҳозирда Michael Kors ва Jimmy Chоо каби брендларга эгалик қилмоқда. Prada Group бош директори Андреа Герра бу харид компанияга янги имкониятлар очишини таъкидлади, лекин Versace брендининг катта салоҳиятига қарамай, “олдинда узоқ ва мураккаб йўл” кутаётганини қўшимча қилди.
Келишув нархига 2 апрелда АҚШ президенти Дональд Трамп томонидан жорий этилган қўшимча божлар бевосита таъсир кўрсатган. Америка Италиядан келадиган товарларга 20 фоизлик бож белгилади, бу эса Versace’нинг 1,6 миллиард долларлик баҳосини 1,38 миллиард долларгача туширди.
Шунингдек, Capri Holdings’нинг молиявий ҳолати ҳам аҳамиятли бўлган. Versace бренди сўнгги даврда 15 фоиз даромадини йўқотган. Таҳлилчилар бренднинг янги ривожланиш стратегиясига муҳтож эканлигини таъкидлашмоқда.
Bloomberg’нинг таъкидлашича, Versaceъни сотиб олиш Prada’га ўз позицияларини кучайтиришга ҳамда LVMH ва Kering каби жаҳон гигантларига қарши рақобатлашишга ёрдам беради.
Vogue’нинг хабарига кўра, Versace Capri Holdings’нинг Tapestry билан қўшилишига АҚШнинг Федерал савдо комиссияси (FTC) тўсқинлик қилганидан сўнг сотувга қўйилган. Шундан кейин Capri Holdings ўз стратегиясини ўзгартириб, асосий эътиборни Michael Kors брендига қаратди. Ҳозирда компания Jimmy Chоо бренди учун ҳам харидор изламоқда.
Эслатиб ўтамиз, Capri Holdings (аввал Michael Kors Holdings) 2019 йилда Versace’ни 2,1 миллиард доллардан ортиқ суммага сотиб олган эди.
Versace модалар уйи 1978 йилда Жанни Версаче томонидан ташкил этилган. 1997 йилда Жанни вафот этганидан сўнг, унинг синглиси Донателла Версаче брендни бошқарган ва креатив директор сифатида унинг эстетикасини давом эттирган. Донателла брендни нафақат сақлаб қолган, балки XXI асрга мослаштиришга ҳам муваффақ бўлган. Ўтган ойда у ўз лавозимини тарк этди. Унинг ўрнини Miu Miu’дан Дарио Витале эгаллади.
Изоҳ (0)