Конго бош ҳарбий аудитори 22 август куни ҳарбий судга қотиллик, зўрлаш ва қийноқлар каби ҳарбий жиноятлар учун сиртдан судланаётган собиқ президент Жозеф Кабиланинг ўлим жазосига ҳукм қилинишини талаб қилаётганини расман маълум қилди. Бу ҳақда Reuters хабар берди.
Кабила 2018 йилда истеъфога чиқишдан олдин деярли йигирма йил Конго Республикасини бошқарган. 2023 йил охиридан бери у хорижда, асосан, Жанубий Африкада истиқомат қилмоқда. Охирги марта уни Конгонинг беқарор шарқидаги қўзғолончилар назорати остидаги ҳудудда омма олдида кўришган.
У Конгода инсониятга қарши жиноятлар, жумладан, тинч аҳолини оммавий қирғин қилишда иштирок этгани учун қидирилмоқда.
Армия бош аудитори генерал Ликулия Люсен Рене Олий судга қотиллик, зўрлаш, депортация ва қийноқлар, шунингдек, бошқа жиноятлар учун ўлим жазоси берилишини сўраётганини билдирган.
Апрель ойида Кабила уруш бўлаётган шарқда тинчлик ўрнатишга ёрдам бериш учун Конгога қайтишини эълон қилди. Ўша ойда Конго ҳукумати дарҳол унинг сиёсий партиясини тақиқлади ва активларини мусодара қилди.
Май ойида Конго Сенати Кабилани суд таъқибидан маҳрум қилиш учун овоз берди. Ой охирида эса Кабила қўзғолончилар назорати остидаги мамлакат шарқида пайдо бўлди ва у ерда диний раҳбарлар билан учрашган.
Изоҳ (0)