Italiyaning mashhur Prada modalar uyi o‘ziga raqobatchi bo‘lgan yirik brend — Versace’ni sotib olish bo‘yicha kelishuvga erishdi. Bu haqda Capri Holdings xabar bermoqda.
1,38 milliard dollarlik shartnoma ikkala kompaniyaning direktorlar kengashlari tomonidan tasdiqlangan. Muzokaralar 2025-yilning ikkinchi yarmida yakunlanishi kutilmoqda.
Versace brendi Capri Holdings konsernining tarkibiga kiradi, u hozirda Michael Kors va Jimmy Choo kabi brendlarga egalik qilmoqda. Prada Group bosh direktori Andrea Gerra bu xarid kompaniyaga yangi imkoniyatlar ochishini ta’kidladi, lekin Versace brendining katta salohiyatiga qaramay, “oldinda uzoq va murakkab yo‘l” kutayotganini qo‘shimcha qildi.
Kelishuv narxiga 2-aprelda AQSH prezidenti Donald Tramp tomonidan joriy etilgan qo‘shimcha bojlar bevosita ta’sir ko‘rsatgan. Amerika Italiyadan keladigan tovarlarga 20 foizlik boj belgiladi, bu esa Versace’ning 1,6 milliard dollarlik bahosini 1,38 milliard dollargacha tushirdi.
Shuningdek, Capri Holdings’ning moliyaviy holati ham ahamiyatli bo‘lgan. Versace brendi so‘nggi davrda 15 foiz daromadini yo‘qotgan. Tahlilchilar brendning yangi rivojlanish strategiyasiga muhtoj ekanligini ta’kidlashmoqda.
Bloomberg’ning ta’kidlashicha, Versace’ni sotib olish Prada’ga o‘z pozitsiyalarini kuchaytirishga hamda LVMH va Kering kabi jahon gigantlariga qarshi raqobatlashishga yordam beradi.
Vogue’ning xabariga ko‘ra, Versace Capri Holdings’ning Tapestry bilan qo‘shilishiga AQSHning Federal savdo komissiyasi (FTC) to‘sqinlik qilganidan so‘ng sotuvga qo‘yilgan. Shundan keyin Capri Holdings o‘z strategiyasini o‘zgartirib, asosiy e’tiborni Michael Kors brendiga qaratdi. Hozirda kompaniya Jimmy Choo brendi uchun ham xaridor izlamoqda.
Eslatib o‘tamiz, Capri Holdings (avval Michael Kors Holdings) 2019-yilda Versace’ni 2,1 milliard dollardan ortiq summaga sotib olgan edi.
Versace modalar uyi 1978-yilda Janni Versache tomonidan tashkil etilgan. 1997-yilda Janni vafot etganidan so‘ng, uning singlisi Donatella Versache brendni boshqargan va kreativ direktor sifatida uning estetikasini davom ettirgan. Donatella brendni nafaqat saqlab qolgan, balki XXI asrga moslashtirishga ham muvaffaq bo‘lgan. O‘tgan oyda u o‘z lavozimini tark etdi. Uning o‘rnini Miu Miu’dan Dario Vitale egalladi.
Izoh (0)