АҚШ 9 апрель куни Хитойдан олиб кириладиган товарларга қўйиладиган божхона тўловларини 104 фоизгача оширди. Бу ҳақда Bloomberg хабар берди.
АҚШ президенти Дональд Трамп 2 апрель куни 185 та мамлакатдан импорт қилинадиган маҳсулотларга бож жорий этилишини айтганди. Хитойдан келтириладиган маҳсулотлар учун божлар 34 фоиз даражасида белгиланган. Бунга жавобан Пекин ҳам шунча миқдорда Америка товарларига божлар солган.
Шундан сўнг Трамп агар Пекин жавоб чораларидан воз кечмаса, божларни 50 фоизгача ошириш билан таҳдид қилган эди. Шу сабабли божлар 104 фоизга ошмоқда.
Оқ уй матбуот котиби Керолайн Ливиттга кўра, Трамп Хитойнинг келишувга эришишга интилаётганини кўрмоқда.
Пекин жавоб чораларини қўллаб хато қилди, агар Америка ҳужумга учраса, у бундан ҳам кучлироқ зарба беради, деган Ливитт.
У агар “Хитой қўл чўзса, Трамп унга мурувват кўрсатишга тайёр” эканини билдирган. АҚШ президенти бу борада Пекиндан қўнғироқ кутаётгани таъкидланган.
Трампнинг Хитой ҳамда бошқа кўплаб давлатлардан импорт қилинадиган маҳсулотларга божлар жорий этиш қарори дунё бўйлаб сиёсатчилар ва иқтисодчиларнинг кескин танқидига сабаб бўлди. Молиявий бозорлар эса бу хабарга индексларнинг кескин пасайиши билан жавоб қайтарди.
Бундан ташқари, нефть нархларининг ҳам кескин тушиб кетгани кузатилди. Dpa агентлиги хабарига кўра, бу қарор глобал истеъмол нархларининг ошиши ва иқтисодий ўсишнинг секинлашувига олиб келиши мумкин. Трамп томонидан жорий этилган янги савдо божлари унинг ҳозиргача амалга оширган энг тажовузкор ва кенг қамровли савдо сиёсати деб баҳоланмоқда.
Изоҳ (0)