Украина армияси Донецк вилоятида Россия томонидан жанг қилаётган хитойлик икки ҳарбийни асирга олди. Бу ҳақда Украина президенти Владимир Зеленский хабар берди.
Украина Ташқи ишлар вазирлиги Хитойнинг муваққат ишлар вакилини чақиртирди. Вазирлик асирга олинганларнинг Украинага қарши урушга жалб қилинганини қоралади. Пекин асирлар ҳақидаги маълумотларга ҳозирча изоҳ бермаган.
Россия бўлинмаларида Хитой фуқаролари иккитадан анча кўп экани ҳақида маълумотлар бор. Ҳозир барча фактларни аниқлаяпмиз. Украина разведкаси, хавфсизлик хизмати, Қуролли кучларнинг тегишли бўлинмалари ишламоқда, деди Зеленский.
Таъкидланишича, украиналик аскарлар олти нафар хитойлик билан жангга киришган. Улардан икки нафари асирга олинган. Зеленский асирларнинг ёнида ҳужжатлар ва банк карталари борлигини маълум қилди. Хитойлик асирлар акс этган видеода улардан бири она тилида сўзлашаётгани, имо-ишоралар билан урушдаги вазиятни тушунтираётганини кўриш мумкин.
Владимир Зеленский ташқи ишлар вазирига “зудлик билан Пекин билан боғланиш” ва Хитойнинг реакциясини олишни топширди. Россия расмийлари ҳам Хитой фуқаролари асирга олингани ҳақида ҳеч нарса демаган.
Январь ойида Украина армияси Курск вилоятида шимолий кореялик икки аскарни асирга олганди. Президент Владимир Зеленский 12 январь куни улар сўроққа тутилгани акс этган видеони эълон қилган. Сўроқ пайтида КХДР аскарлари қаердалигини билмаслиги, уларга бу фақат ўқув машғулоти деб айтилганини таъкидлаган.
Изоҳ (0)