Хитойнинг Хебей провинциясидаги қариялар уйида юз берган ёнғин оқибатида 20 киши ҳалок бўлди. Бу ҳақда The Guardian хабар берди.
Ёнғин 8 апрель куни кечаси Лонгҳуа районидаги қариялар уйида юз берган. Бу жой Пекиндан тахминан 180 километр шимоли-шарқда жойлашган. Қурбонлар сони 9 апрель кунига келиб 20 кишини ташкил этган.
Қариялар уйидаги бошқа кексалар яқин атрофдаги шифохоналарга кўчирилган, уларнинг соғлиғи текширилмоқда ва муолажалар давом этмоқда, дейилади хабарда.
Ёнғин сабаблари ҳозирда аниқланмоқда. Хитойда бундай ҳодисалар нисбатан кўп учрайди, чунки қурилиш меъёрлари суст назорат қилинади ва иш жойларида хавфсизлик талабларига етарлича эътибор берилмайди.
Январь ойида Пекин шимолида жойлашган Зҳангжиакоу округидаги сабзавот бозорида ёнғин чиққан эди. Оқибатда саккиз киши ҳалок бўлган, 15 киши жароҳат олган. Март ойида эса Хитой шарқидаги Ронгченг шаҳридаги қурилиш майдончасида юз берган ёнғинда 9 киши ҳалок бўлган.
Изоҳ (0)