АҚШ президенти Дональд Трампнинг ўзи жорий этган божхона тўловларига 90 кунлик муҳлат эълон қилмоқчи экани ҳақида тарқалган маълумот ёлғон бўлиб чиқди. Бу ҳақда Оқ уй матбуот хизматига асосланиб, CNBC хабар берди.
Инкор этилган маълумотларга кўра, Оқ уй Миллий иқтисодий кенгаши директори Кевин Хассетт гўё муҳлат Хитойдан ташқари барча давлатларга нисбатан қўлланилиши мумкинлигини айтган.
Бундан олдин Bloomberg нашриёти Хитойнинг Америка божхона тўловларига тезкор жавоби Пекиннинг Вашингтон бошлашни истаган савдо урушига тайёрлигидан дарак беришини таъкидлаган эди. Ўз навбатида, ХХР Ташқи ишлар вазирлиги вакили Лин Сзян Вашингтоннинг божхона тўловларини ҳақорат ва қўрқитиш сифатида баҳолаш кераклигини айтди.
Эслатиб ўтамиз, АҚШ президенти Дональд Трамп 2 апрель куни 185 та мамлакат ва ҳудуддан келтирилаётган маҳсулотларга божхона тўловлари жорий этилишини эълон қилганди. Хитойга нисбатан АҚШ божлари 34 фоиз даражасида белгиланди. Бунга жавобан Хитой ҳукумати 10 апрелдан бошлаб АҚШдан импорт қилинадиган барча маҳсулотларга 34 фоиз миқдорида қўшимча божлар жорий этилишини маълум қилди. Шундан сўнг АҚШ президенти ўзининг ижтимоий тармоғида Хитойнинг АҚШга қарши жавоб тариқасида бож тўловлари киритиши хато қадамлигини билдириб, танқид қилганди.
Изоҳ (0)