Эртага, 8 ноябрдан бошлаб дунёнинг яна тўққизта давлати фуқаролари Хитойга визасиз киришлари мумкин бўлади.
Хитой ҳукумати жорий йил бошида бошланган визасиз кириш дастурини кенгайтириб, Словакия, Норвегия, Финляндия, Дания, Исландия, Андорра, Монако, Лихтенштейн ва Жанубий Кореяни ҳам ушбу дастурга қўшди. Хитой Ташқи ишлар вазирлиги матбуот котиби Лин Жиан матбуот анжумани чоғида таъкидлаганидек, дастур 2025 йил 31 декабргача амал қилади.
Янги дастур 2024 йилнинг январида ишлай бошлади ва унга аста-секин янги давлатлар ҳам қўшилмоқда. Йил бошидан буён у Европанинг 11 давлати, жумладан, Австрия, Германия, Франция, Ирландия, Нидерландия, Италия ва Швейцария, шунингдек, Малайзия фуқароларига ҳам татбиқ этилди. Июнь ойи охирида рўйхатга Польша, Австралия ва Янги Зеландия қўшилди. Дастур шартларига кўра, унга киритилган барча давлат фуқаролари Хитойга ўзларининг оддий паспортлари билан кириб, мамлакатда 15 кунгача визасиз қолишлари мумкин.
Ушбу дастурнинг кенгайтирилиши сайёҳлар оқимини ошириши кутилмоқда. 2019 йилда, COVID-19 пандемиясидан олдин, Хитойга бошқа мамлакатлардан 49,1 миллионга яқин сайёҳ ташриф буюрган. 2024 йилнинг биринчи етти ойида хорижий сайёҳлар сони 17,25 миллионга етди, биринчи ярим йилликда визасиз кириш дастурига қўшилган мамлакатлардан келган сайёҳлар сони 8,5 миллион кишини ташкил этди.
Бу ўтган йилнинг шу даврига нисбатан 190 фоизга кўпдир. Январь сентябрь ойларида Хитойга 8,18 миллион хорижий сайёҳ ташриф буюрди, улардан 4,9 миллиони визасиз дастур доирасида келган сайёҳлар. Бу кўрсаткич ўтган йилнинг шу даврига нисбатан қарийб 80 фоизга кўпдир. Хитойга энг фаол ташриф буюрувчилар Жанубий Корея фуқаролари: 2019- йилда 4,3 миллион, 2023 йилда эса 1,3 миллион кореялик Хитойга келган.
Хитойда яна бир визасиз кириш дастури мавжуд бўлиб, ундан 54 давлат, жумладан АҚШ, Канада ва Буюк Британия фуқаролари фойдаланиши мумкин. Ушбу мамлакатлар фуқаролари Хитойга 37 пунктдан бири орқали кириб, учинчи давлатга саёҳат қилиш учун чиптага эга бўлса, мамлакатда 72 ёки 144 соат давомида визасиз қолиш имкониятига эга.
Изоҳ (0)