Поёнига етаётган йилда халқаро алоқалар ривожланиб, хорижий давлатлар билан муносабатлари янги босқичга кўтарилди. Жумладан, Ўзбекистон ва Хитой ўртасидаги алоқалар 2024 йил тарихан энг юқори даражага кўтарилди. Хитой Халқ Республикасининг фавқулодда ва мухтор элчиси Юй Сзюн шу мавзуда сўз юритди.
“Давлатларимиз раҳбарлари йил давомида икки бор учрашди. Президент Шавкат Мирзиёевнинг Хитойга давлат ташрифи ХХР–Ўзбекистон муносабатларини янги даврда ҳар томонлама стратегик шерикликнинг тарихий янги босқичига кўтарди.
Хитой учун Ўзбекистон билан муносабатнинг бундай мақоми Марказий Осиё миқёсида ягона бўлиб, халқларимизнинг ўзаро манфаатли ҳамкорликни мустаҳкамлашга нисбатан юксак сиёсий ишонч даражасини тўлиқ ифодалайди”, деди Юй Сзюн.
Жорий йил икки давлат ўртасидаги товар айирбошлаш қиймати барқарор ўсиб, 11 миллиард доллардан ошди.
“Хитой Ўзбекистоннинг биринчи рақамли иқтисодий ҳамкори эканлиги бизга мамнунлик бахш этади. Ҳозир мамлакатингизда 3300 дан кўп Хитой корхонаси рўйхатга олинган. Савдо ва сармоя, янги энергия, алоқа, инфратузилма, замонавий қишлоқ хўжалиги, саноат ишлаб чиқариши каби энг муҳим соҳаларда шериклик чуқурлашмоқда.
Кўплаб қўшма лойиҳалар изчил амалга оширилмоқда. Хитой—Қирғизистон—Ўзбекистон темирйўли қурилиши бошланиши жуда қувонарли воқеа. Ишончим комилки, мазкур ташаббус минтақа давлатлари тараққиёти, халқларимиз фаровонлигига хизмат қилади”, дея таъкидлади элчи.
Ўзбекистонга келаётган хитойлик сайёҳлар сони сезиларли даражада ортиб, йилига 60 минг кишидан ошди, Хитойга Ўзбекистондан ташриф буюрганлар сони эса ўтган йилга нисбатан 60 фоиз кўпайди.
“Яқинда мамлакатларимиз ўртасида ўзаро визасиз режим тўғрисидаги шартнома имзоланди. Мазкур битим кучга киргач, фуқароларимизнинг икки давлат ўртасида ҳаракатланиши янада қулайлашади ва жадаллашади.
Маълумки, бошланаётган 2025 йил Ўзбекистонда “Атроф-муҳитни муҳофаза қилиш ва яшил иқтисодиёт йили” деб эълон қилинди. Биз ҳам доим янги энергетика, илмий-техникавий инновация, рақамли иқтисодиёт, экология соҳаларида ҳамкорлик кўламини кенгайтиришга интиламиз. Барқарор иқтисодий ривожланишни рағбатлантириш учун юқори ва тоза технологиялардан кенг фойдаланамиз”, деди Юй Сзюн.
2025 йилда Шанхай ҳамкорлик ташкилотининг 25-саммити Хитойда ўтади. Ўзбекистон мазкур тузилма доирасидаги “Барқарор ривожланиш йили”га бағишлаб 100 дан зиёд тадбир уюштиришни режалаштирган. Ўзбекистон аввалгидек Хитойни раислик фаолиятида қўллаб-қувватлаши, ШҲТ барқарор ва соғлом ривожланишига ҳисса қўшиши кутилмоқда.
Изоҳ (0)