Қозоғистон: Жаҳон туризм рейтингида 119 та давлат ичида 52-ўринда

Қозоғистон Жаҳон иқтисодий форумининг 2024 йилги саёҳат ва туризмни (Т&Т) ривожлантириш индексида 119 та давлат ичида 52-ўринни, нарх рақобатбардошлиги бўйича эса 2-ўринни эгаллади.

Нархлар рақобатбардошлиги мезони бўйича Қозоғистон иккинчи ўринни эгаллади, — дея хабар беради Қозоғистон Туризм ва спорт вазирлиги.

Йил давомида республика жаҳон туризм рейтингида 14 поғонага кўтарилган.

Рейтинг етакчилари эса ўзгаришсиз қолган: АҚШ биринчи, Испания ва Япония мос равишда иккинчи ва учинчи ўринларни эгаллаган. Франция, Австралия, Германия, Буюк Британия, Хитой, Италия ва Швейцария кучли ўнликни якунлаган. Марказий Осиё давлатлари орасида Озарбайжон (56), Ўзбекистон (78), Қирғизистон (102) мазкур рўйхатдан жой олган .

Туризм соҳасини сифат жиҳатидан ривожлантиришга интилишимиз рейтингнинг турли мезонлар, жумладан, нархлар рақобатбардошлиги, хизмат кўрсатиш сифати ва ижтимоий-иқтисодий таъсири бўйича яхшиланишида ўз ифодасини топмоқда, — деди Қозоғистон туризм ва спорт вазири Эрмек Маржикпаев.

Аниқлик киритилишича, энг юқори балл туризмнинг ижтимоий-иқтисодий самараси (5), саломатлик ва гигиена (23), табиий (30) ва маданий ресурслар (48), шунингдек, инсон капитали ва меҳнат бозори (43), туризм инфратузилмаси ва хизматлари (47) тоифаларига берилган.

Жаҳон иқтисодий форуми сайти маълумотларига кўра, Қозоғистонга 4,5 миллион нафар хорижий сайёҳ ташриф буюрган. Туризмдан тушган тушумлар 1,5 миллиард долларни ташкил этган. 2023 йилда мамлакат миллиондан ортиқ хорижликни қабул қилган, 2022 йилда бу кўрсаткич 928 мингта бўлган.

Аксарият сайёҳлар саёҳат қилиш учун Олмаота шаҳрини танлайди. 2023 йилда шаҳарга икки миллиондан ортиқ сайёҳ ташриф буюрган бўлиб, шундан 540 минг нафари хорижликлардир.

2023- йили Қозоғистонга Россия, Хитой, Туркия, Ҳиндистон ва АҚШдан сайёҳлар кўпроқ ташриф буюрган. Жорий йилда Қозоғистон БААдан келган сайёҳлар учун муқаддас Рамазон ойи ва Рамазон ҳайити учун энг машҳур манзилга айланди. 2023 йилда визасиз режим жорий этилганидан бери Қозоғистонга саёҳат қилаётган хитойлик сайёҳлар сони 115 фоизга ошган.