Хитойдан Европага юкларнинг қарийб 85 фоизи Қозоғистон орқали олиб ўтилади, деди Қозоғистон бош вазири Алихон Смаилов Хитой бош вазири ўринбосари Дин Сюесян билан учрашувда. Бу ҳақда Қозоғистон ҳукумати раҳбари сайтидаги хабарда айтилади.
Смаиловнинг сўзларига кўра, жорий йилнинг 10 ойи давомида мамлакатлар ўртасидаги товар айирбошлаш ҳажми қарийб чоракка ошган.
Бош вазир 10 ноябрдан кучга кирган визасиз режим Қозоғистон — Хитой муносабатларида янги саҳифа очаётганини қўшимча қилди.
“Ушбу чора ишбилармонлик алоқаларини рағбатлантириш, савдони соддалаштириш, ўзаро инвестицияларни кўпайтириш ва туризмни ривожлантиришга сезиларли таъсир кўрсатади. Бу, айниқса, яқинлашиб келаётган Хитойда Қозоғистоннинг туризм йили муносабати билан долзарбдир”, — деди Смаилов.
Аввалроқ Смаилов Қозоғистоннинг Туркистон вилоятида 152 километр узунликдаги Дарвоза—Мақтаорол янги темирйўл линияси қурилиши бошлангани ҳақида хабар берганди.
Қозоғистон президенти Қосим-Жўмарт Тўқаев топшириғи билан республиканинг транспорт-транзит салоҳиятини янада ривожлантиришга қаратилган йирик инфратузилма лойиҳаси амалга оширилмоқда. Унинг доирасида Қозоғистон-Ўзбекистон давлат чегараси орқали янги назорат-ўтказиш пункти очилади.
Изоҳ (0)