Суриянинг муваққат президенти Аҳмад ал-Шараъа Туркия президенти Ражаб Тойиб Эрдўғонга мамлакатда турк ҳарбий базаларини жойлаштиришни таклиф қилди. Бу ҳақда манбаларга таяниб, Reuters хабар берди.
Ал-Шараъа ва Эрдўғон 4 февраль куни бўлиб ўтган учрашувда қўшма мудофаа пактини муҳокама қилган. Унга кўра, Суриянинг марказий қисмида Туркия авиабазаларини ташкил этиш ва янги Сурия армиясини тайёрлаш кўзда тутилган. Туркия Сурия ҳаво ҳудудидан ҳарбий мақсадларда фойдаланиши мумкин.
Сурия хавфсизлик хизмати вакили анонимлик шарти билан айтишича, муҳокама қилинаётган базалар Туркияга келажакда ҳар қандай ҳужумлар содир бўлган тақдирда Сурияни ҳимоя қилиш имконини беради. Авиабазалар Хомс вилоятидаги Палмира ҳарбий аэропорти ва Сурия армиясининг Т4 базасида жойлаштирилиши мумкин.
Эрдўғоннинг айтишича, у учрашувда Суриядаги курд қуролли гуруҳларига қарши биргаликда курашиш, Исроил армиясини Голан тепаликлари ҳудудидан олиб чиқиш масалалари муҳокама қилинган. Музокаралар якунида сиёсатчилар ҳеч қандай келишувга эришмаган.
Туркиянинг аллақачон Сурия шимолида, давлат чегараси яқинида ҳарбий базалари мавжуд. Улар мамлакатни курд тузилмаларидан ҳимоя қилишга мўлжалланган. Ал-Шараъа ва Эрдўғон ўртасидаги музокараларни ёритган мухбир улар янги мудофаа шартномаси ҳақида суҳбатлашганини айтди.
“Улар янги ҳарбий базалар ҳақида гаплашмоқда. Уларнинг жойлашуви ҳозирча номаълум”, деган журналист.
Суриядаги Россия базалари тақдири
3 февраль куни Россия ташқи ишлар вазири ўринбосари Михаил Богданов Россиянинг Суриядаги базаларининг келгуси тақдири масаласи қўшимча музокараларни талаб этишини айтганди. Москва Тартус портидаги ҳарбий-денгиз базасини ва Латакия порти яқинидаги авиабазасини сақлаб қолмоқда. Иккала база ҳам Ўрта ер денгизи соҳилида, Тияс ва Палмирадан 150 километрдан ортиқ масофада жойлашган.
Аммо, ОАВ маълумотларига кўра Туркияга ўтиши мумкин бўлган ҳарбий базаларда ҳам Россия ҳарбий кучлари мавжуд бўлган. Россия ҳарбий авиацияси Тиясдан вақтинчалик қўниш майдони сифатида фойдаланган. У ерда Эрон тарафдори бўлган кучлар ҳам жойлашганди. 2016 йилда Associated Press агентлиги Россия Қуролли кучлари Палмирадаги аэродромни қайта жиҳозлашга уринаётгани ҳақида хабар тарқатганди. Бироқ у ерда тўлақонли ҳарбий база қад ростламаган.
Изоҳ (0)