Сурия Мудофаа вазирлиги вакили Ҳасан Абдул Ғани “эски режим қолдиқларига қарши амалиёт” якунланганини маълум қилди. Унинг сўзларига кўра, эндиликда давлат муассасалари одатдаги фаолиятини тиклаб, аҳоли учун зарур хизматларни кўрсатишни бошлайди. Бу ҳақда Al Arabiya хабар бермоқда.
Биз аҳолини нормал ҳаётга қайтариш ва хавфсизликни мустаҳкамлаш йўлида ҳаракат қиляпмиз, деди вазирлик вакили.
У, шунингдек, собиқ ҳукумат тарафдорларининг қолган қисмига қарши кураш давом эттирилишини ва келажакдаги ҳар қандай таҳдид бартараф этилишини қўшимча қилди.
Бироқ жараён тинч аҳолидан қурбонларсиз ўтмади. Британияда жойлашган Сурия инсон ҳуқуқлари кузатув маркази (Syrian observatory) берган маълумотга кўра, икки кунлик жангларда 1 000 дан ортиқ инсон ҳалок бўлган. Улар орасида 745 нафар тинч аҳоли вакили, 125 нафар хавфсизлик ходими ва 148 нафар Асадга содиқ жангчилар бор.
Суриянинг янги етакчиси Аҳмад аш-Шаръа 9 март куни қилган чиқишида зўравонликларга алоқадор шахсларни жавобгарликка тортишга ваъда берди. У, шунингдек, тўқнашувлар ва ҳар икки томондан содир этилган қотилликларни ўрганиш учун мустақил тергов қўмитаси тузаётганини маълум қилди.
Абдул Ғанининг қўшимча қилишича, хавфсизлик кучлари тергов қўмитаси билан ҳамкорлик қилиб, барча маълумотларга тўлиқ кириш имконини беради.
Биз собиқ режим тарафдорларининг ҳужумларини бостира олдик ва уларнинг кутилмаган ҳужумларига барҳам бердик. Муҳим марказларни қўриқлаб, асосий йўлларни назоратга олдик, дея қўшимча қилди у.
Ўзи нима бўлди?
Башар Асад ўтган йилнинг декабрь ойида ҳокимиятдан ағдарилгандан кейин мамлакатда нисбий осойишталик ҳукм сураётган эди. Аммо сўнгги кунларда унинг собиқ тарафдорлари янги ҳокимиятга қарши исён бошлагач, мамлакатнинг асосан алавийлар яшовчи қирғоқбўйи ҳудудларида қуролли тўқнашувлар бошланди. Собиқ президент айни шу диний жамоага мансуб.
Хабарларга кўра, исённи Башар Асад даврида махсус кучлар собиқ қўмондони бўлган Суҳайл ал-Ҳасан билан алоқадор қуролли гуруҳлар бошлаган.
Изоҳ (0)