АҚШ Қуролли кучлари Суриядаги “Ал-Қоида” террорчилик гуруҳи раҳбарларидан бирини йўқ қилди. Бу ҳақда президент Дональд Трамп ўзининг Truth Social ижтимоий тармоғидаги саҳифасида ёзди.
Трампнинг сўзларига кўра, йўқ қилинган террорчи бутун минтақа бўйлаб “Ал-Қоида” билан ҳамкорлик қилган. Гап айнан қайси етакчи ҳақида кетаётгани айтилмаган.
Ушбу дам олиш куни АҚШ қўшинлари Суриядаги “Ал-Қоида” аъзоларидан бирига юқори аниқликдаги авиазарба берди, деди президент.
У АҚШ Қуролли кучлари Марказий қўмондонлиги раҳбари Майкл Курилл ва ҳарбий учувчиларни муваффақиятли операция билан табриклади.
АҚШ Марказий қўмондонлиги хабарига кўра, 15 февраль куни Сурия шимоли-ғарбидаги ҳудудга берилган зарба натижасида “Ал-Қоида”га алоқадор “Хуррас ад-Дин” ташкилоти етакчиларидан бири ўлдирилган. У гуруҳда молиявий операциялар ва логистика учун масъул бўлган.
Ҳужум террорчиларнинг АҚШ фуқаролари ва ҳарбийларига қарши ҳужумларни режалаштириш, ташкил этиш ва амалга ошириш бўйича уринишларини барбод қилиш мақсадида амалга оширилди, дейилади хабарда.
2024 йил Покистон ҳуқуқ-тартибот идоралари ходимлари “Ал-Қоида” етакчиларидан бири, Усама бин Ладеннинг яқин сафдоши Амин ул-Ҳақни ҳибсга олганди.
2023 йил май ойида эса АҚШ Марказий қўмондонлиги Суриядаги “Ал-Қоида” етакчисига уюштирган ҳаво ҳужуми оқибатида оддий фермер ҳалок бўлганини тан олганди.
“Ал-Қоида” экстремистик гуруҳи жаҳоннинг бир қатор мамлакатлари ва халқаро ташкилотлар томонидан “террорчилик ташкилоти” деб топилган.
Изоҳ (0)