Дамашқ аэропортига Россиядан мамлакатнинг собиқ президенти Башар Асад даврида муомалага чиқарилган юз миллиардлаб Сурия фунтлари партияси етиб келди, деб ёзади Reuters хабардор манбага таяниб.
Аниқланишича, ушбу маблағлар ўн миллионлаб АҚШ долларига тенг. Агентлик суҳбатдошининг сўзларига кўра, 2024 йил декабрь ойи бошида исёнчилар Асадни ағдарганида Россия бу пулларни Сурияга ўтказишга улгурмаган.
Қайд этилишича, Суриянинг янги ҳукумати Асад Москвага қочиб кетганидан кейин Россиядан валюта чиқаришни тўхтатишни талаб қилган. Reuters манбаси Россияни босма нақд пулларни Сурияга етказиб беришга нима ундаганига аниқлик киритмаган.
Ҳукумат ўзгарганидан сўнг мамлакат ликвидлик тақчиллигига дуч келди ва январь ойида Сурия Марказий банкининг янги раҳбари Майса Сабрин кескин кўтарилган инфляцияни тўхтатиш учун Сурия фунтларини чоп этишни тўхтатмоқчи эканлигини айтди.
Reuters хабарига кўра, янги раҳбариятнинг ҳокимиятга келиши билан Сурия фунти қора бозорда мустаҳкамланди, бунга хориждан сурияликларнинг келиши ва хорижий валюта савдоси устидан қатъий назоратнинг бекор қилиниши ёрдам берди. Биржа маълумотларига кўра, 13 февраль куни миллий валюта 1 доллар учун 9850 фунтга сотилган. Марказий банк маълумотларига кўра, биржалар ёпилган 14 февраль куни расмий курс 1 доллар учун 13 минг фунт атрофида бўлган.
Агентлик суҳбатдошининг маълум қилишича, Сурия регулятори атиги 200 млн доллар нақд валюта захирасига эга ва бу 2010 йилдаги кўрсаткичдан жуда катта пасайишдир, ўшанда Халқаро валюта жамғармаси Суриянинг 18,5 млрд доллар захирасига эга бўлганини тахмин қилган.
12 февраль куни Россия президенти Владимир Путин Суриянинг амалдаги раҳбари Аҳмад аш-Шаръа билан илк бор телефон орқали мулоқот қилган эди. Суҳбат чоғида Россия раҳбари суриялик ҳамкасбига ижтимоий-иқтисодий вазиятни яхшилашга, жумладан, “Сурия аҳолисига инсонпарварлик ёрдами кўрсатиш”га ваъда берди.
Путинга кўра, Россия Суриянинг бирлиги, суверенитети ва ҳудудий яхлитлигини “принципиал жиҳатдан қўллаб-қувватлайди”, шунингдек, янги ҳукуматга мамлакатдаги вазиятни барқарорлаштиришда ёрдам беришга тайёр. Шунингдек, Сурия раҳбари маъмуриятида Путин Суриянинг янги ташқи ишлар вазирини Москвага ташриф буюришга таклиф қилгани ва Москва Асад даврида имзоланган икки томонлама келишувларни қайта кўриб чиқишга тайёрлигини маълум қилган.
Сурия Россияда пул чоп этишни бошлашидан олдин Австрия Марказий банкининг шўба корхонаси Oesterreichische Banknoten-und Sicherheitsdruck GmbH билан бу борада келишувга эришган эди, деб ёзади Reuters.
Изоҳ (0)