Сурия ҳарбий-ҳаво ва ҳарбий-денгиз базаларини сақлаб қолиши учун Россияга имконият беришга тайёр, бунда Кремль билан ҳар қандай келишув мамлакат манфаатларига мос келиши керак. Бу ҳақда Сурия мудофаа вазири Мурҳаф Абу Қасра баёнот берди.
-L4EbIkGe.jpg)
Вазир янги ҳукумат эски алоқаларни қайта кўриб чиқаётганини қайд этди. У Россия муносабати декабрда президент Башар Асад ағдарилганидан сўнг “сезиларли даражада яхшилангани” ва Дамашқ Москванинг талабларини ўрганаётганини маълум қилди.
Россияга Тартусдаги ҳарбий-денгиз портини ва Латакиядаги Хмеймим авиабазасини сақлаб қолишга рухсат бериладими, деган саволга жавоб берар экан, Абу Қасра шундай деди:
“Агар бу Сурия учун фойдали бўлса, ҳа”.
Мудофаа вазири Суриянинг муваққат президенти Аҳмад ал-Шаръа ўтган ой охирида Россия расмийлари билан учрашганида Асадни экстрадиция қилишни сўраган-сўрамаганини аниқ тасдиқлашдан бош тортди. Аммо Асадни жавобгарликка тортиш масаласи учрашувда кўтарилганини айтди.
“Башар Асад Россияга боришга қарор қилганида, биз руслар билан келиша олмаслигимизни ўйлаганди... Эҳтимол, улар билан муносабатлар шундай тикланадики, бу аввало Сурия манфаатларига, кейин эса уларнинг манфаатларига хизмат қилади”, деб таъкидлади Абу Қасра.
Ташқи ишлар вазири ўринбосари Михаил Богданов бошчилигидаги Россия делегацияси томонлар Асад мақомини муҳокама қилган-қилмаганига изоҳ бермади. Богданов таъкидлади:
Сўнгги ҳафталарда содир бўлган воқеалар натижасида фуқароларимиз ва объектларимизга зарар етмагани учун миннатдорлик билдирдик.
Унинг сўзларига кўра, Россия ҳарбий иштироки бўйича келишув “қўшимча музокараларни талаб қилади”.
“Ҳали ҳеч нарса ўзгаргани йўқ... Биз чуқурроқ маслаҳатлашувларни давом эттиришга келишиб олдик”, деган вазир.
Сурия расмийларига кўра, ўтган ойда Сурия Тартус портининг тижорат қисмини бошқариш бўйича Россия компанияси билан шартномани бекор қилган, бироқ Россия ҳарбий иштирокининг келажаги ноаниқлигича қолмоқда.
Изоҳ (0)