Сурияда собиқ президент Башар Асад тарафдорлари ва хавфсизлик кучлари ўртасида қонли тўқнашувлар бўлиб ўтди. Қурбонлар сони минг кишидан ошди. Амалдаги президент Аҳмад ал-Шараъа (ал-Жулоний) вазиятга муносабат билдирди. Бу ҳақда Reuters хабар берди.
Буюк Британияда жойлашган Сурия инсон ҳуқуқлари обсерваториясининг айтишича, тўқнашувлар 13 йиллик фуқаролик урушининг энг шафқатсизи ҳисобланади. Муваққат президент Аҳмад Шараъа собиқ президент Башар Асад ва унинг тарафдорларини муросага чақириб: “Биз миллий бирлик ва ички тинчликни сақлаб қолган ҳолда биргаликда яшай оламиз”, деди.
Сурия ҳақида хотиржам бўлинг, бу мамлакат ҳали яшайди. Ҳозир Сурияда содир бўлаётган воқеалар олдиндан кутилган эди, деди Шараъа Дамашқдаги масжидда сўзлаган нутқида.
Башар Асад ҳокимияти 2024 йилнинг декабрь ойида ағдарилди. Унинг оиласи ўнлаб йиллар давомида сулолавий ҳукмронлик қилган бўлиб, бу давр қонли қатағонлар ва ҳалокатли фуқаролар уруши билан ажралиб турган. Асад ҳокимиятининг ағдарилиши сулолавий бошқарувга, шафқатсиз қатағонларга ва 2011 йилда тинч норозилик ҳаракати сифатида бошланиб, ҳалокатли фуқаролар урушига айланиб кетган воқеаларга якун ясади.
Ғарб, Араб мамлакатлари ва Туркия Асадга қарши кучларни қўллаб-қувватлаган. Россия ҳамда Эрон эса Асаднинг ҳокимиятда қолишини истаган. Бу уруш юз минглаб одамларнинг ҳаётига зомин бўлди ва миллионлаб сурияликларни ватанидан айирди.
Асад ағдарилгандан кейин Сурияда бир неча ойлик нисбий осойишталик ҳукм сурди. Март ойидан бошлаб эса Ал-Жулоний Латакия ва Тартус шаҳарларида Асаднинг алавий мазҳаби томонидан кучайиб бораётган исёнини бостиришга мажбур бўлди.
Аҳмад Шараъа билан учрашган Европа иттифоқи вакили Суриядаги “тинч аҳолига қарши барча зўравонликларни” ва “барқарор ва узоқ муддатли истиқболларга путур етказишга бўлган ҳар қандай уринишларни” қоралади.
Изоҳ (0)