Сурияда юзлаб одамлар Россиянинг Хмеймим базасига яширинишга мажбур бўлди. Инсон ҳуқуқлари бўйича Сурия кузатув кенгаши (SOHR) мамлакатда содир бўлаётган воқеаларни “оммавий қирғин” ва “сўнгги йиллардаги энг даҳшатли зўравонлик жиноятлари” деб баҳоламоқда. Бу ҳақда Reuters хабар берди.
Х ижтимоий тармоғидаги айрим фойдаланувчилар базадаги аёллар ва болаларнинг суратларини жойлаштирди. Унга кўра, базадан христиан, друз ва алавий қочқинлари бошпана сифатида фойдаланмоқда. Ушбу фойдаланувчиларнинг шахсини аниқлаш ҳамда суратларнинг ҳақиқийлигини текшириш имкони бўлмаган.
Ҳокимиятга келган “Ҳайъат Таҳрир аш-Шом” жангчилари ҳозирда Асад кучларининг қолдиқларини йўқ қилаётганини даъво қилмоқда. Улар орасида алавийлар кўп. Алавий қишлоқлари ва шаҳарлари аҳолисининг AP’га айтишича, Сурия хавфсизлик кучлари кўчаларда ёки уй дарвозалари олдида кўплаб эркакларни отиб ташлаган.
Бундан ташқари, алавийларнинг кўплаб уйлари талон-торож қилинган, кейин эса ёқиб юборилган. Маҳаллий аҳолининг сўзларига кўра, минглаб одамлар ўз жонларини сақлаб қолиш учун тоғларга қочиб кетган.
Ливанлик алавий депутат Ҳайдар Носирнинг айтишича, сурияликларнинг бир қисми Ливанга қочмоқда, “кўпчилик эса Россиянинг Хмеймимдаги авиабазасида яширинган”.
Хавфсизлик бўйича эксперт Роб Гейст Пинфолднинг Al Jazeera’га айтишича, ҳозирги ваҳшийликлар Суриянинг янги расмийлари ва Асад тарафдорлари тинчлик келишуви тузмагани билан боғлиқ. Унинг фикрича, 14 йиллик фуқаролар урушидан сўнг Сурияда жиноятларга алоқадор бўлмаган одамлар жуда кам қолган.
Аслида, Аҳмад аш-Шаръа раҳбарлигидаги янги ҳукуматнинг шу пайтгача вазиятни шунчалик узоқ вақт назоратда ушлаб туришга эришгани жуда ҳайратланарли. Бироқ энди уларнинг сохта ҳаракатлари фош бўлди. Улар муносабат билдириши, қатъий чоралар кўриши, бу ерда ўзларининг бош куч эканлигини намоён этиши, аммо, шу билан бирга, алавийларни ўзларидан узоқлаштирмасликлари лозим, дея таъкидлади Пинфолд.
Мамлакат аҳолисининг тахминан 10 фоизини ташкил этувчи суриялик алавийлар Асад даврида муҳим рол ўйнаган. Уларнинг аксарияти 2024 йил декабрь ойида қуролларини ташлаган, қолганлари қаршиликни давом эттиришга қарор қилган. Асаднинг рақиблари ҳокимиятга келгач, ОАВда диний озчиликлар таъқиб қилинаётгани ҳақида хабарлар пайдо бўлди.
Буюк Британияда жойлашган Сурия инсон ҳуқуқлари обсерваториясига кўра, икки кун ичида мамлакатда 1000 дан ортиқ фуқаро ҳалок бўлди. Уларнинг камида 745 нафари тинч аҳоли вакиллари ҳисобланади.
Сурия хавфсизлик кучларининг Латакия ва Тартусдаги операцияси
AFP агентлиги ва France 24 канали маълумотларига кўра, Суриянинг амалдаги ҳукумати операциясига Башар Асад режими тарафдорлари томонидан уюштирилган ҳужумлар сабаб бўлди.
6 март куни Суриянинг янги ҳукумати ушбу этник гуруҳ жойлашган Латакия ва Тартус шаҳарларида йирик операцияни бошлади.
Германия Ташқи ишлар вазирлиги ва БМТнинг Сурия бўйича махсус вакили Гейр Педерсен содир бўлаётган воқеалардан хавотир билдириб, барча томонларни кескинликни юмшатишга чақирди. Ўз навбатида, Халқаро қизил хоч қўмитаси ярадорларга ёрдам кўрсатиш учун минтақага тўсиқсиз киришни таъминлашни талаб қилди.
Россиянинг Суриядаги ҳарбий базалари
Россиянинг Сурияда иккита базаси бор: Хмеймимдаги авиабаза ва Тартусдаги ҳарбий-денгиз базаси. 6 февраль куни Сурия Мудофаа вазирлиги раҳбари Мурхаф Абу Касра ушбу базалар келишувга эришилган тақдирда сақланиб қолишини айтди. 2024 йил декабрь ойида Асад ҳокимиятдан ағдарилганидан бери Россиянинг Суриянинг янги ҳокимиятига муносабати “сезиларли даражада яхшиланди”, деди вазир.
Изоҳ (0)