Сурия муваққат президенти Аҳмад ал-Шараъа (ал-Жулоний) Саудия Арабистонига ташрифи чоғида Умра зиёратини адо этди. Бу ҳақда Arab News хабар берди.
Ал-Жулоний 2 февраль куни Ар-Риёдга етиб борди ва валиаҳд шаҳзода Муҳаммад бин Салмон билан учрашди. У Суриянинг хавфсизлиги ва барқарорлигини қўллаб-қувватлаш йўлларини муҳокама қилди. Бу Ал-Шараъанинг лавозимга тайинланганидан сўнг амалга оширган биринчи хорижий сафари ҳисобланади. Ал-Жулоний ташриф давомида Маккада Умра зиёратини адо этди.
Ал-Шараъа 4 февраль куни Туркия раҳбари Ражаб Тоййиб Эрдўғоннинг таклифига биноан Анқарага ташриф буюради.
Сурияда ҳокимият алмашинуви ва Саудия Арабистонининг роли
Ал-Шараъа 29 январь куни Сурия муваққат президенти этиб тайинланди. Унинг раҳбарлигидаги “Ҳаёт Таҳрир аш-Шам” (ХЦҲ) гуруҳи декабрь ойи бошида Сурия президенти Башар Асадни ағдаришга бошчилик қилди.
Саудия Арабистони подшоҳи Салмон ва унинг ўғли шаҳзода Муҳаммад бин Салмон Аш-Шараъани Сурия президенти лавозимига тайинлангани билан табриклаган биринчилардан бўлди. Сурия уруш вайрон қилган мамлакатни қайта тиклашни молиялаштириш ва иқтисодиётни жонлантириш учун Форс кўрфазининг бой давлатлари ёрдамига умид қилади.
Январь ойи ўрталарида Саудия Арабистони Сурияга қарши санкцияларни бекор қилиш тарафдори бўлди. Декабрь ойида Асад тахтдан ағдарилганидан бери Суриянинг янги ҳукумати бир қатор хорижий сиёсатчиларни, шу жумладан Германия ташқи ишлар вазири Анналена Бербокни қабул қилди. У январь ойи бошида Сурияга ташриф буюрганди.
Изоҳ (0)