Биринчи қисмиданоқ қизиқтира олади: кутилмаган сюжетга эга 7 та корейс драмаси

Корейс драмалари нафақат романтик ҳикоялари, балки мураккаб сюжетли детективлар, психологик триллер ва кутилмаган бурилишларга эга ҳикоялари билан ҳам ажралиб туради. Биринчи қисмиданоқ қизиқтириб қўядиган ва охиригача завқ билан томоша қилинадиган сериалларни излаётган драма ихлосмандлари учун қуйида энг сара сериаллар рўйхатини келтирамиз.

“Ёвузлик гули”

Пек Хи Сон бир қарашда энг яхши турмуш ўртоқ, ғамхўр ва меҳрибон ота ҳамда ўз оиласига садоқатли шахсдек кўринади. Аммо унинг ўтмиши билан боғлиқ даҳшатли сири бор: Пек ўзининг аслида ким эканлигини барчадан яширади. Унинг рафиқаси Чха Жчи Вон эса детектив бўлиб ишлайди ва касб тақозоси билан бир қатор қотилликларни ўргана бошлайди, унинг сўнгги топшириқлари эса ҳайратланарли сирларнинг очилишига сабаб бўлади.

Мазкур драма сўнгги йиллардаги энг қизиқарли ва драматик корейс сериалларидан биридир. Лойиҳа детектив ҳикоялар ва психологик триллерларни яхши кўрадиганлар учун айни муддао бўлади.

“Ўлим ўйини”

Драма худди шу номдаги веб-тун (webtoon — Жанубий Кореяда пайдо бўлган ва асосан смартфонларда ўқиш учун мўлжалланган рақамли комикслар тури) асосида яратилган бўлиб, ҳаётда бериладиган иккинчи имконият, тақдир ва адолат ҳақида ҳикоя қилади. Бош қаҳрамон Чхве И Чже ҳаётда бир қатор муваффақиятсизликларни бошдан кечиради: у ишсиз қолади, келажагида ҳеч қандай истиқбол кўрмайди ва бу учун атрофидагилар уни доим айблаб, танқид қилади. Сўнг бош қаҳрамон умидсизликка тушиб, ўз жонига қасд қилишга қарор қилади.

Аммо унинг олдида Ўлим исмли сирли аёл пайдо бўлади. Аёл Чхвени шафқатсиз “ўйин”га жўнатиб, ўз жонига қасд қилишга урингани учун уни жазолайди: Чхве И Чже тез орада ўлиши керак бўлган турли одамларнинг танасида 12 марта реинкарнация қилинади ва ҳар сафар у ўлимдан қочиш имкониятига эга бўлади. Ўзининг реинкарнация жараёнида қаҳрамон қайта туғилган одамларнинг ҳаёт сирларини ўрганади, ўз ўтмишини қайта кўриб чиқишни бошлайди ва тақдирини ўзгартириш имконияти доим борлигини англаб етади.

“Винченцо”

Бош қаҳрамон Винченцо Кассано (Сон Жун Ги) болалигида асраб олинган ва Италияга кетган бўлади. У италян мафия оиласида ўсиб, профессионал адвокат ва стратег бўлиб етишади. Мафиялар орасида бўлиб ўтган можаролар ва жанжаллардан сўнг, у Жанубий Кореяга қайтишга мажбур бўлади. Ватанида у адолатсизликка қарши курашади ва жиноятчилардан қасос олиш учун ўз усулларидан фойдаланади.

У ердаги маҳаллий адвокат Хонг Ча Ён билан ҳамкорлик қилиб, коррупцияга ботган йирик компания — унга тегишли олтинлар сақланадиган бинони қайтариб олиш учун курашади.

“Иблис исмингни чақирганда”

Бош қаҳрамон Ха Рип (Чон Ген Хо) муваффақиятли ва машҳур бастакор, аммо унинг барча ютуқлари ортида шайтон билан келишув туради. Кўп йиллар аввал у шон-шуҳрат, пул ва муваффақият учун ўз жонини шайтонга сотган бўлади. Сўнг шартнома муддати тугаш арафасида Мо Те Кан (Пак Сон Ун) кўринишидаги иблис унинг руҳини олиб кетишга келади.

Умрини узайтирмоқчи бўлган Ха Рип муваффақиятининг сабабчиси аслида ёш бастакор Ли Геннинг (Ли Сол) истеъдодини ўғирлаш эканлигини билиб олади. Қаҳрамон айбини ювишга уриниб, унга ёрдам бера бошлайди ва бу жараёнда номоддий нарсалар — муҳаббат, дўстлик ва самимийлик пул ва машҳурликдан муҳимроқ эканини тушуниб етади.

 “Шайтоний судья”

Сериалдаги воқеалар Жанубий Корея иқтисодий ва сиёсий инқироз гирдобига тушган даврда бўлиб ўтади. Ҳукумат суд тизимини ислоҳ қилиш учун жонли эфирда ўтказиладиган оммавий суд жараёнларини йўлга қўяди.

Бош қаҳрамон Кан Ё Ҳан (Жи Сун) машҳур судья бўлиб, жиноятчиларни шафқатсиз тарзда жазолаши билан танилади. Унинг суд залидаги қарорлари театр саҳнасига ўхшаб кетади ва у ўзини “Шайтоний судья” деб атайди. Бироқ у ҳақиқатан ҳам адолат учун курашяптими ёки шахсий мақсадларини яширинча амалга оширяптими, бу савол томошабинларни ўйлантириб қўяди. Судья деярли ҳар бир эпизодда янги мунозарали ишларни кўриб чиқади.

“Айлана”

Сериалдаги воқеалар иккита замонда содир бўлади: 2017 йил ва 2037 йил. Ушбу икки дунё бир-бири билан боғланган бўлиб, сирли ҳодисалар ва технологик ўзгаришлар натижасида ривожланади.

2017 йил: Ким Ву Жин ва унинг акаси сирли ҳодисалар ва ғойиб бўлган инсонларнинг сабабини текшираётган пайтда бу ишларнинг ортида бегона мавжудотлар ёки илғор технологиялар борлигини тушуниб етади.

2037 йил: Жанубий Корея иккига: Ёруғ шаҳар ва Оддий дунёга бўлинган. Ёруғ шаҳар мукаммал технологиялар билан бошқарилади ва барча инсонлар унда тинч, хотиржам ҳаёт кечиради. Аммо детектив Жун Ҳёк бу идеал дунё ортида аянчли ҳақиқат борлигини билади ва уни барчага фош қилишга ҳаракат қилади.

“Сичқон”

Ли Синг Ги бош ролидаги мазкур психологик триллерда табиат ва тарбия мавзулари кўтарилади: унда серияли қотиллар шундай туғиладими ёки ҳаёти давомида қотилга айланадими, деган савол ўртага ташланади.

Детектив Чон Ба Рим (Ли Син Ги) шафқатсиз серияли қотилга дуч келмагунча ҳалол ҳаёт кечиради. Аммо унинг қонида психопатларга хос ген бўлиши мумкинлигини билгач, унинг ҳаёти тубдан ўзгаради.